Gbẹtọ lẹ na ko to jejeji taun to Nazalẹti. Whẹpo Jesu do tọ́nyi Johanu dè nado yin bibaptizi to nudi owhe dopo linlán die, whlẹpatọ de wẹ e yin to finẹ. Ṣigba todin, e yin yinyọnẹn taidi dawe he nọ wà azọ́n huhlọnnọ lẹ. Mẹhe to otò lọ mẹ lẹ to jejeji nado mọ lehe e na wà azọ́njiawu ehelẹ to ṣẹnṣẹn yetọn do.

Apàpà sọ sọ́ yé dogọ to whenue Jesu yì sinagọgu lẹdo lọ tọn mẹ, dile e ko yin aṣa etọn do. Sinsẹ̀n-bibasi to finẹ nọ bẹ odẹ̀ po adà owe Mose tọn lẹ tọn de hihia po hẹn, dile e nọ yin wiwà do “to sinagọgu lẹ mẹ to gbọjẹzan dopodopo gbè.” (Owalọ lẹ 15:21) Adà owe dọdai tọn delẹ tọn sọ nọ yin hihia ga. Whenue Jesu ṣite nado hiawe, e na ko mọ nukunmẹ delẹ he e ko jẹakọ hẹ sọn ojlẹ he mẹ e ko jẹ sinagọgu enẹ mẹ yì ji. Owe-hihá yẹwhegán Isaia tọn yin zize na ẹn. E hùn in do fie dọhodo Mẹhe gbigbọ Jehovah tọn yiamisisadode lọ ji, yèdọ fie sọgbe hẹ Isaia 61:1, 2 to egbezangbe.

Jesu hia lehe Mẹhe go dọdai lọ gando na dọyẹwheho tundote tọn na kanlinmọ lẹ, nukunnumimọ tọn na nukuntọ́nnọ lẹ, podọ wiwá owhe alọkẹyi Jehovah tọn do. E sọ ze owe-hihá lọ jo na devizọnwatọ lọ bo sinai. Mẹlẹpo wẹ to pinpọn ẹn tlintlin. Enẹgodo e dọho, vlavo na ojlẹ de, podọ e yí hogbe ayidego tọn ehelẹ zan to hodidọ etọn mẹ dọmọ: “Egbehe wẹ adà Owe-wiwe tọn he mì ṣẹṣẹ sè ehe yin hinhẹndi.”—Luku 4:21.

Avò vò gbẹtọ lẹ, na “ohó ojọmiọn tọn he to tintọ́n sọn onù etọn mẹ lẹ” wutu, bọ yé nọ dọna ode awetọ dọ: “Ehe wẹ visunnu Josẹfu tọn, kavi e ma yin mọ wẹ?” Ṣigba, Jesu doayi e go dọ yé jlo dọ e ni wà azọ́n huhlọnnọ he yé ko sè gandego lẹ, enẹwutu e zindonukọn dọmọ: “Matin ayihaawe, mìwlẹ na yí apajlẹ ehe zan gando go e dọ, ‘Dotozọ́nwatọ, hẹnazọ̀ngbọna dewe. Nuhe mí sè bọ yé jọ to Kapẹlnaumi lẹ, basi yé ga to otò towe titi mẹ tofi.’” (Luku 4:22, 23) Kọmẹnu Jesu tọn hoho lẹ sọgan ko lẹndọ whégbè wẹ e jẹ dọ azọ̀nhẹngbọ ni bẹsọn, na omẹ etọn titi lẹ whẹ́whẹ́ nido duale etọn. Enẹwutu, yé sọgan ko mọdọ Jesu de yé pò.

To whenue Jesu doayi nulẹnpọn yetọn go, e donù nujijọ whenuho Islaeli tọn delẹ go. E dọ dọ asuṣiọsi susu wẹ to Islaeli to azán Elija tọn lẹ gbè, ṣigba Elija ma yin didohlan depope to yé mẹ dè. Kakatimọ, asuṣiọsi he ma yin Islaelivi de dè wẹ e yì to Zalefati, yèdọ tòpẹvi de he sẹpọ Sidoni, fie Elija wà azọ́njiawu he whlẹn ogbẹ̀ gán de te. (1 Ahọlu lẹ 17:8-16) Podọ pòtọnọ susu wẹ tin to Islaeli to azán Eliṣa tọn gbè, ṣigba Naamani Silianu lọ kẹdẹ wẹ yẹwhegán lọ hẹn zun wiwe.—2 Ahọlu lẹ 5:1, 8-14.

Nawẹ mẹhe wá sọn otò dopolọ mẹ po Jesu po ehelẹ yinuwa gbọn to whenue yé mọdọ nuyijlẹdonugo he yin didesọn whenuho mẹ lọ lẹ hùngona ṣejannabi po yise matindo yetọn po? Mẹhe to sinagọgu lọ mẹ lẹ gblehomẹ bo fọnṣite bosọ sisẹ́ Jesu jẹ gbonu tòdaho lọ tọn. Yé plan ẹn jẹ bẹbẹnu osó he ji Nazalẹti yin gbigbá do lọ tọn bo tẹnpọn nado sisẹ́ ẹ sọn tónu lọ. Ṣigba, Jesu họ̀ngán sọn alọ yetọn mẹ bo yì awuyẹyẹ-afọyẹyẹ. Todin, Jesu dedo Kapẹlnaumi he to Ohù Galili tọn tó to agewaji.