Kũrĩ na gĩkeno kĩingĩ mũno taũni-inĩ ya Nazarethi. Atanathiĩ kũbatithio nĩ Johana ta mwaka ũmwe na kĩndũ mũhĩtũku, Jesu aarĩ bundi wa mbaũ gũkũ. No rĩu oĩkaine ta mũndũ wĩkaga maũndũ manene. Aikari a gũkũ me na wendi mũnene mũno wa kuona agĩka maũndũ macio gũkũ kwao.

Wendi ũcio wao ũkongerereka Jesu athiĩ thunagogi-inĩ o ta mũtugo. Maũndũ marĩa mekagwo kũu nĩ hamwe na kũhoya na gũthoma kuuma mabuku-inĩ ma Musa, o ta ũrĩa gwĩkagwo “thunagogi-inĩ thabatũ ciothe.” (Atũmwo 15:21) Ningĩ no gũthomagwo tũcunjĩ twa mabuku ma anabii. Jesu arũgama gũthoma, no kũhoteke nĩ araririkana mothiũ maingĩ onaga mĩaka ĩrĩa akoretwo agĩthiĩ thunagogi-inĩ. Akanengerũo gĩkũnjo kĩa mũnabii Isaia. Akona harĩa harĩrĩirie ũhoro wa Ũrĩa ũitĩrĩirio maguta kũgerera roho wa Jehova, gacunjĩ karĩa konekaga ũmũthĩ thĩinĩ wa Isaia 61:​1, 2.

Jesu agathoma ũrĩa Ũcio weranĩirũo angĩkahunjia atĩ arĩa mohetwo nĩ mekuohorũo, atumumu nĩ mekuona, na gũũka kwa mwaka wa gwĩtĩkĩrĩka nĩ Jehova. Athoma, akanengera ndungata gĩkũnjo kĩu na agaikara thĩ. Maitho mothe marĩ harĩ we. Agacoka akaaria, kwahoteka ihinda iraihu, na mĩario-inĩ yake akagweta ciugo ici itangĩriganĩra: “Rĩandĩko rĩu mwaigua nĩ rĩahinga ũmũthĩ.”​—Luka 4:21.

Andũ makagega nĩ ‘ciugo njega iria iroima kanua gake,’ na makorania ũũ: “Na githĩ ũyũ ti mũrũ wa Jusufu?” No Jesu akamenya atĩ marenda kuona agĩka maũndũ manene marĩa maaiguĩte, akameera: “Nĩ njũĩ nĩ mũkũhũthĩra ciugo ici harĩ niĩ, ‘Ndagĩtarĩ, wĩhonie wee mwene. Maũndũ marĩa tũraiguire atĩ nĩ ũrekire Kaperinaumu, meke gũkũ kwanyu o nakuo.’ ” (Luka 4:22, 23) Andũ acio a itũũra rĩrĩ Jesu aarereirũo marona atĩ agĩrĩirũo kwamba kũhonania kwao mũciĩ nĩguo andũ a kwao mambe magunĩke. Kwoguo makona ta Jesu aramanyarara.

Amenya ũrĩa mareciria, Jesu akagweta maũndũ meekĩkire historĩ-inĩ ya Isiraeli. Akoiga atĩ kwarĩ na atumia aingĩ a ndigwa thĩinĩ wa Isiraeli hĩndĩ ya Elija, no ndaatũmirũo kũrĩ o na ũmwe wao. Ĩndĩ, aathire kũrĩ mũtumia wa ndigwa ũtaarĩ Mũisiraeli taũni-inĩ ya Zarefathu ĩrĩa yarĩ hakuhĩ na Sidoni, na kũu Elija akĩringa kĩama kĩahonokirie muoyo. (1 Athamaki 17:​8-16) Ningĩ matukũ-inĩ ma Elisha, kwarĩ na andũ aingĩ maarĩ na mangũ thĩinĩ wa Isiraeli, no mũnabii ũcio aahonirie o Naamani ũrĩa Mũsiria.​—2 Athamaki 5:​1, 8-14.

Andũ acio a itũũra rĩa Jesu mekũiyũkia atĩa ũndũ ũcio hihi marona ũtarĩ mwega wa kũringithania maũndũ ma tene, ũrĩa ũraguũria atĩ nĩ eendi na matirĩ na wĩtĩkio? Arĩa marĩ thunagogi-inĩ makarakara, magokĩra, na makarutũrũra Jesu nja ya itũũra. Makamũtwara kĩharũrũka-inĩ gĩa kĩrĩma kĩrĩa itũũra rĩu rĩakĩtwo, makageria kũmũikia agwe thĩ. No akemunya kuuma moko-inĩ mao na akora. Jesu rĩu agaikũrũka Kaperinaumu, mwena wa ithũĩro wa Iria rĩa Galili.