Kwa kubula nangwa kuzhinaukatu ne, bantu mu Nazala basangalele bingi. Mwaka wafumineko saka akyangye kuya kwi Yoano na kubatizhiwa, Yesu wayukanyikilwe mu uno muzhi amba kalipentala. Bino pa kikye kimye wayukanyikilwe’mba muntu uba bya kukumya. Bangikazhi basakishe bingi kuba’mba ebobilepo bya kukumya.

Yesu byo atwelele mu nshinagoga byonka byo aubanga kimye kyonse, bantu po po bakijishemo kukeba kumona byavula. Pa kupopwela, balombele ne kutanga mabuku a kwa Mosesa, byonka byo baubanga ‘juba jonse ja sabado mu mashinagoga.’ (Byubilo 15:21) Kabiiji batangile ne mu mabuku a bungauzhi. Yesu byo aimene na kutanga, wafwainwa wayukilepo bantu bamo boamonanga mu nshinagoga saka akiji mwanyike. Kabiji bamupele muvungilo wa ngauzhi Isaya. Wataaine po kyanembwa pa mambo a Mushingwa ye bashingile na mupashi wa Yehoba, lelo jino bino byambo bitanwa mu Baibolo pa Isaya 61:1, 2.

Yesu watangile pa uno Mushingwa byo akasapwila kukasululwa kwa bo bakwata buzha, kulabisha meso a bampofu ne kwibabuula kimye kyo bakobilwa bibusa kwi Yehoba. Yesu wavungile muvungilo ne kumubwezha ku wamwingilo kabiji waikele. Bantu bonse bamwimbulwijile meso. Kepo atendekele kwibambila’mba: “Lelo jino, kino kinembelo kyo mwafumatu na kumvwa, kyafika.”—Luka 4:21.

Bantu bakuminye bingi pa “byambo byawama byafuminenga mu kanwa kanji,” kabiji beambijilenga mulwabo’mba: “Nanchi uno kechi ye mwana wa kwa Yosefwa nenyi?” Bino byo ayukile’mba bakebelenga amba obepo bya kukumya byo baumvwanga pe aye, Yesu wibambijile’mba: “Kwa kubula nangwa kuzhinaukatu ne, musakuñambila bino byambo amba, ‘Anweba shayuka wa michi, ibukai. ‘Ubai ne muno mu nyaunda yenu bintu byo twaumvwine’mba mwibyubile mu Kapenama.’” (Luka 4:22, 23) Bantu mo baikelanga nyaunda imo ne Yesu balangulukilenga’mba kubuka kwafwainwe kutatwila mu muzhi wanji kuba’mba bantu banji patanshi bamwenemo. Onkao mambo, balangulukilenga’mba Yesu wibalengulula.

Yesu byo ayukile ndangulukilo yabo, wibabuujilepo bintu bimo byamwekejile bena Isalela kala. Waambile’mba mu moba a Elaija, mu Isalela mwajinga banabakazhi bavula bafwijilwe, bino Elaija kechi bamutumine ku bano banabakazhi ne. Pakuba bamutumine ku mwanamukazhi wafwijilwe wabujile mwina Isalela wajinga mu Zalefwata, muzhi wa mu kyalo kya Shidona, ko akobijile kya kukumya kya kusangula mwana wafwile. (1 Bamfumu 17:8-16) Kabiji mu moba a Elisha, mu Isalela mwajinga bambumba bavula, bino Elisha wabukileko Nemani mwina Silya.—2 Bamfumu 5:1, 8-14.

Bena Nazala baubile byepi pa kumvwa byambo byaambile Yesu byasolwele byajinga mu michima yabo ne kubula lwitabilo kwabo? Aba bajinga mu nshinagoga bamuzhingijile bingi Yesu kabiji bamuvundumukijile ne kumutwala pangye ya muzhi. Kabiji bamutwajile kunsa ya mutumba po bashimikijile muzhi wa Nazala, kuba’mba bamushinjikile munshi. Bino aye wapichile monka mukachi kabo ne kuya wayile. Kufuma po po, Yesu wayile ku Kapenama, muzhi waikejile ku muzhika buyeke bwa Kalunga ka Ngalilea.