Nazarete yawonso inikukini. Vioka mvu amvimba vitila kavubwa kwa Yoane, Yesu mvadi a nti kakala muna Nazarete. Kansi, owau ozayakene vo nkwa mavangu ma nkuma. Esi Nazarete bazolele mona masivi mandi muna vata diau.

E tima diau diwokele ekolo Yesu kakotele muna sambilu, kadi i fu kiandi. Nze una uvangamanga “muna masambilu lumbu yawonso ya vundu,” o samba yo tanga nkanda mia Mose, i diambu ditoma vangamanga mpe mu sambilu dia Nazarete. (Mavangu 15:21) Vetangwanga mpe kunku ya nkanda mia angunza. Vava Yesu katelamene mu kwenda tanga, nanga osungamene wantu ayingi kalungananga yau omu sambilu diadi tuka kolo. Oveno nkand’a Yesaya. Osolwele fulu kivovelanga Muntu wakuswa muna mwand’a Yave. O unu e diambu diadi diasonama muna Yesaya 61:1, 2.

Yesu otangidi edi diasakulwa mu kuma kia Ndiona osamuna luvevoko kwa abakami, otemona meso ma mpofo ye ngiz’a mvu a dienga dia Yave. Yesu ovutwidi ngungu kwa selo kimosi, i bosi ovuende. Awonso muna sambilu bantungunwini. Yesu oyantikdidi vova, nanga ovovele mu kolo kiandá. I bosi, ovovele mvovo emi miamfunu: “O unu e sono kiaki nuwidi kilunganene.”—Luka 4:21.

Wantu basivikidi muna “mambu mambote mavaikidi muna nu’andi,” bavovazianini vo: “Ondioyu nga ke mwan’a Yosefe ko e?” O Yesu wau kabakwidi vo nkangu bazolele mona masivi, nze dina bawidi, Yesu okwamanene vova vo: “Kalukatikisu ko vo, se nwavova diambu diadi mu kuma kiame, ‘E nganga, ukiwuka. Mana tuwidi mavangamene muna Kafanau, vanga mo mpe mwamu vata diaku.’” (Luka 4:22, 23) Esi vata dia Yesu nanga babenze vo muna sadisa nkangu andi, e salu kiandi kia wuka kifwete yantikila muna vata diandi. Wau kalembele wo vanga, bayindwidi vo Yesu ke kubavuanga mfunu ko.

Wau kabakwidi makani mau, Yesu oyikidi maka mambu ma lusansu lwa Isaele. Ubavovese vo, muna lumbu ya Eleya mwakala akento ayingi a nsona muna Isaele, kansi Eleya katumwa kwa yau ko. Kansi, watumwa kwa nkento a nsona kuna Sarefate dia Sidone, i kûna Eleya kavangila e sivi dia vuluza mioyo mia wantu. (1 Ntinu 17:8-16) Muna lumbu ya Elesa wa ngunza, mwakala ye akwa wazi ayingi muna Isaele, kansi Namani wa Nsuria kaka kawuka.—2 Ntinu 5:1, 8-14.

Esi Nazarete adieyi bavangidi wau babakwidi vo loko diau yo kondwa kwau kwa lukwikilu i kavovele o Yesu muna nona yayi? Awana bena muna sambilu bafungidi makasi, babakidi Yesu, bankokele kuna fula dia mbanza. Bele yandi vana lunenga-nenga lwa mongo, vana vatungilwa Nazarete, bavavidi kunengomona kuna ndimba. Kansi Yesu ofionokene vana moko mau lembi vangwa e mbi. Wele kuna Kafanau, kuna node ya Mbu a Ngalili.