Kakuyi mpata, bena mu Nazaleta bavua kuulu kuulu. Kumpala kua Yezu kumbukaye muaba eu bua kumubatizabu kudi Yone, kukavua tshidimu tshijima ne ndambu wa ngondo, ne uvua muena mabaya. Kadi mpindieu uvua mumanyike bu muntu uvua wenza midimu ya bukole. Bantu ba muaba eu bavua ne muoyo kuulu kuulu bua kumumona wenza imue ya ku midimu eyi munkatshi muabu.

Ditekemena diabu edi divua divule pavua Yezu muye ku nsunagoga wa muaba eu bilondeshile tshilele tshiende. Mu malu avuabu benza muaba eu muvua disambila ne dibala malu a mu mikanda ya Mose, bu mutubu benza ‘mu nsunagoga dituku dionso dia nsabatu.’ (Bienzedi 15:21) Bavua babalamu kabidi bitupa bia malu a mu mikanda ya baprofete. Pakimana Yezu kuulu bua kubala, uvua pamuapa mumanye mpala ya bantu ba bungi batu babuela mu nsunagoga eu kukavua bidimu bia bungi. Bakamupesha muvungu wa muprofete Yeshaya. Kupetaye muaba uvuabu bakula bua Muntu uvua muedibue manyi a nyuma wa Yehowa, mêyi aa adi lelu mu Yeshaya 61:1, 2.

Yezu udi ubala bua muvua Muntu ukavuabu bamanyishe eu mua kuyisha dilekedibua dia badibu bakuate, dipetulula lumonu dia bampofu, ne bua dilua dia tshidimu tshivua Yehowa wanyisha. Ke Yezu kupesha mulami wa bintu muvungu ne kusombaye. Bantu bonso bakashala bamutangile ne ntema yonso. Pashishe wakatuadija kuakula, pamuapa mutantshi mule, ne mu malu avuaye wamba muvua mêyi a mushinga aa: “Lelu mufundu unudi nufuma ku diumvua eu mmukumbane.”​—Luka 4:21.

Bantu bakakema bua “mêyi malenga avua apatuka mukana muende,” ne bakambilangana ne: “Eu si mmuana wa Jozefe, ki mmuomu?” Kadi pavua Yezu mujingulule ne: mbasue bua kumumona wenza malu a kukema a buena avuabu bumvue bualu buawu, wakatungunuka wamba ne: “Kakuyi mpata nenungelele lusumuinu elu: ‘Munganga diondopa. Enza kabidi mu buloba buenu emu malu atudi bumvue menzeke ku Kapênuma.’” (Luka 4:22, 23) Bantu ba muaba uvua Yezu kale aba bavua pamuapa badiambila ne: diondopa bantu divua ne bua kutuadijila kuabu, bua kuambuluisha bena kuabu kumpala. Nanku bavua mua kuikala bela meji ne: Yezu kavua mubangate ne mushinga to.

Pavua Yezu mujingulule meji avuabu bela, wakatela amue malu avua menzekele bena Isalele. Wakamba ne: kuvua bakaji bakamba ba bungi mu Isalele mu matuku a Eliya, kadi kabavua batume Eliya kudi mukaji mukamba nansha umue wa kudibu to. Kadi wakaya kudi mukaji mukamba uvua kayi muena Isalele wa mu Salefata, tshimenga tshivua pabuipi ne Sidona, muaba uvua Eliya muenze tshishima tshia kubishangana ku lufu. (1 Bakalenge 17:8-16) Mu matuku a Elisha, kuvua bena nsudi ba bungi mu Isalele, kadi muprofete eu wakondopa amu Namana muena Sulia.​—2 Bakalenge 5:1, 8-14.

Ntshinyi tshivua bantu ba mu tshimenga tshia ba Yezu aba benze bua miyuki ivuabu mua kumona bu difuanyikija dia malu divua kadiyi dimpe divua diela patoke budinangi buabu ne dipanga diabu dia ditabuja? Bantu bavua mu nsunagoga bakafiika munda, kujukabu, ne kuyabu nende lukasa pambelu pa tshimenga. Bakaya nende pa lusongo lua mukuna pavuabu bibakile tshimenga tshia Nazaleta, ne bakakeba bua kumukupa kuinshi kua mukuna. Kadi Yezu wakabasuluka mu bianza kabayi bumvua to, ne kuyaye kayi mupete njiwu. Yezu udi mpindieu upueka mutangile ku Kapênuma, uya ku nord kua muelelu wa Mbuu wa Galela lua ku ouest.