Vatu vamuNazaleta vawahililile chikuma omu vamwene Yesu nakinduluka cheka kwimbo lyenyi. Yesu apwilenga muka-kusonga maliva shimbu kanda ayenga kuli Yowano vakamumbapachise, kafwe mwaka umwe kunyima. Oloze halwola kanelu vatu vamutachikijile kupwa muka-kulinga vyuma vyakukomwesa. Vatu vamwimbo lyenyi vafwililile kumumona mwalinga vyuma kanevi vyakukomwesa mungalila yavo.

Vawahililile chikuma hakumona Yesu mwengila musunangonga, nge muze alingilenga lwola lwosena. Valombelenga nakutanga mumikanda yaMose, nge muze valingilenga “mujisunangonga hasambata hasambata.” (Vilinga 15:21) Vatangilenga nawa namijimbu yimwe yamumikanda yavapolofweto. Omu Yesu akatukile mangana aputuke kutanga, atela amwene vatu vavavulu vaze amwenenga kunyima omu ejilenga kusunangonga. Kaha vamuhanyine kutanga mukanda wakuvunga wakapolofweto Isaya. Awanyine haze vasoneka vyaYou vawavisa nashipilitu yaYehova. Mazu kana atwama hamukanda waIsaya 61:1, 2.

Yesu atangile vyaYou vavulukile chimweza uze mwakavilika kulihehwa kuli vafunge, nakutona kuli tupuputa, nakuvilika nawa mwaka waYehova wakwitavila vatu. Omu akumishile kutanga, ahanyine uze mukanda kuli muka-kuzata musunangonga, kaha atwamine. Vatu vosena vashishikile hali ikiye. Kaha aputukile kuhanjika, pamo hatando yayisuku, ahanjikile nawa ngwenyi: “Lelo echi chisoneka munevu ngana chinatesamo.”—Luka 4:21.

Vatu valikomokelele “hamazu amwaza apwile nakulovoka mukanwa kenyi,” kaha vambilenga kuli umwe namukwavo ngwavo: “Ou kumana keshi mwanaYosefweko nyi?” Yesu hakwijiva ngwenyi vali nakusaka kumumona mwalinga vyuma vyakukomwesa ngana vize vevwile, ambile ngwenyi: “Chikupu vene namungutela chishimo chino ngwenu, ‘Ove chimbuke, lyuke ove ivene. Vyuma tunevu vize vinasoloka kuKapelenau, vizate nakuno kungalila yakwimbo lyove nawa.’” (Luka 4:22, 23) Vatu vamwimbo lyenyi vashinganyekele ngwavo atela kuputukila kuka vatu kumahyenyi, mangana vapwenga vatete kunganyala. Ngocho vamwene nge Yesu navaleununa chikuma.

Yesu hakutachikiza mwayile vishinganyeka vyavo, avalwezele mijimbu yasolokele kunyima muIsalele. Avalwezele ngwenyi mumakumbi aElija, muIsalele mwapwile vatuliwe vavavulu, oloze Elija kavamutumine kuli vakikoko. Oloze vamutumine kuya kuZalefwate, mbaka yize yapwilile kwakamwihi nakuShitone, kuli tuliwe uze kapwile kaIsaleleko, kuze akayowele mwono. (Vamyangana 1, 17:8-16) Kaha nawa mumakumbi aElisha, kwapwile vaka-mbumba vavavulu, oloze Elisha atomesele kaha kaSulya Namane.—Vamyangana 2, 5:1, 8-14.

Vyuma muka valingile ava vatu vamwimbo lyaYesu hakwivwa mijimbu yize vamwene nge yayipi, yakusolola michima yavo yalifwi nakuzeneka lufwelelo? Vatu vaze vapwile musunangonga vapihililile, kaha vakatukile nakulovola Yesu munganda. Vamutwalile kusongo yapili yize vatungileho Nazaleta mangana vakamwandumwine hamavu. Oloze Yesu atasunukile nakuchina. Ngocho ayile kuKapelenau, kungenge yaKalungalwiji waNgalileya.