Onge kiawa ni joma odak Nazareth nigi siso makende. Yesu ne en-ga fundi bao e taondni. Chiegni higa achiel mokalo ne oweyo tijno modhi ir Johana mondo obatise. Sani to koro Yesu ong’ere kaka jal ma timo honni. Jo-Nazareth nigi siso ahinya mar nene kotimo honnigo e alworagi kae.

Ilo ma gin-go medore sama gineno ka Yesu dhi e sunagogi ma kanyo kaka nojatimo. Chenro mag sunagogi oriwo lemo kod somo buge mag Musa, mana kaka itimoga “e sunagoke sabato ka sabato.” (Tich Joote 15:21) Weche moko manie buge mag jonabi bende isomoga. Sama Yesu chung’ malo mondo osom, nyalo bedo ni ong’eyo ng’eny joma ni kanyo ma ne onenoga higni mokalo ka biro e sunagogino. Imiye bug janabi Isaya. Oyudo kama wuoyo e wi Jal ma Jehova owiro gi rohone. E ndalowagi, wechego yudore e Isaiah 61:1, 2.

Yesu somo kaka Jalno ne dhi lando wach gonyo joma otue, wach yawo wenge muofni, kod wach higa ma Jehova oyiego ma ne dhi biro. Yesu dwoko bugno ne jakony-tich kae to obet piny. Ji duto ochomo wengegi tir kuome. Bang’e, owuoyo kuom thuolo moro mogwaro, to weche mowacho oriwo wach ma luwoni. Owacho ne jowinjo kama: ‘Kawuononi, wach moa e i Ndiko ma ua winjoni ochopo kare.’​—Luka 4:21.

Ji hum nikech ‘weche mang’won ma wuok e dhoge,’ kendo giwacho e kindgi niya: “Donge mani en wuod Josef, koso?” To nikech Yesu ong’eyo ni gidwaro nene kotimo honni ma chal gi ma ne gisewinjo ni otimo, omedo wachonegi kama: “Onge kiawa ni ubiro tiyo gi wachni kuoma, ‘Laktar, changri ane iwuon. Tim ane e gweng’u kae bende gik ma wasewinjo ni isetimo Kapernaum.’” (Luka 4:22, 23) Nenore ni jogweng’gi ne dwaro ni tije mar chango ji ochakre gi thurgi, mondo okony joggi owuon. Omiyo, ginyalo neno ni Yesu ochayogi.

Nikech Yesu ong’eyo parogi, owuoyo konyisogi gik ma ne otimore e Israel kinde mokalo. Owachonegi ni ne nitie mond liete mang’eny e Israel e ndalo mag Elija. Kata kamano, ne ok oor Elija ir moro amora kuomgi. Kar mano, ne oore mana ir chi liel ma ne ok en Nya-Israel ma nodak e taon miluongo ni Zarefath, kama Elija ne otimoe hono kane oreso ngima. Taondno ne chiegni gi Sidon. (1 Ruodhi 17:8-16) Kendo e ndalo mag Elisha, ne nitie jodhoho mang’eny e Israel. Kata kamano, janabino nochango mana Naman Ja-Siria.​—2 Ruodhi 5:1, 8-14.

Jo-Nazareth timo ang’o bang’ winjo ka Yesu miyogi ranyisi ariyo ma elo ayanga timbegi mag guondo kod kaka gisebedo ka gionge yie chakre chon? Joma nie sunagogi bedo gi mirima, gia malo, kendo gitero Yesu lep-lep oko mar taon. Gitere nyaka e got kama ogerie taon mar Nazareth, kendo gitemo mondo giwite piny. Kata kamano, Yesu tony e lwetgi kendo owuok kanyo ma ok gihinye. Koro Yesu lor mwalo kochomo Kapernaum but wath mar Nam Galili.