A Zeezi bee Nazarɛte, hal tɩ tẽngã nebã sũ-noogã pa tõe n bãng n bilg ye. Sẽn zems yʋʋmd la kiis a wãna, a Zeezi sẽn wa n debd a Zãmbatiis nengẽ n na n deeg lisgã t’a ra vɩɩ Nazarɛte, n yaa ra-wãada. La masã, nebã fãa miime t’a maanda yel-soalma. Tẽngã nebã rata ne b sũy fãa t’a maan yel-soalem beenẽ tɩ b yã.

A Zeezi kẽnga karen-doogẽ wã wa a sẽn da minim n maandẽ wã, tɩ nebã zoe n tagsdẽ tɩ yaa be la a na n maan yel-soalmã. Karen-dotã pʋsẽ, b ra pʋʋsda Wẽnnaam vʋʋsg daar fãa, la b karemd sɛb nins a Moyiiz sẽn gʋlsã. (Tʋʋmã 15:21) B ra karemda no-rɛɛsdbã sɛbã bilf me. A Zeezi wa n yikame n na n tɩ karem tɩ nebã kelge. Tõe t’a bãnga neb kẽere, a sẽn da sɩng n wat be wã yĩnga. B kõ-a-la no-rɛɛs a Ezayi seb-pindmã. A sẽn yidgã, a yãa zĩig ning b sẽn yet tɩ ned la a Zeova na n kõ a vʋʋsem sõngã. Rũndã-rũndã, gom-kãens bee Ezayi 61:1, 2.

A Zeezi sẽn karem zĩig ningã yetame tɩ nin-kãng na n moona yembsã yolsg koɛɛga, n togs zoensã tɩ b na n paama b nini, la a moon bark yʋʋmdã a Zeova sẽn kõtã. Rẽ poore, a kɩsa seb-pindmã la a tɩ zĩndi. Nebã fãa zẽka b nens n get-a. A goma ne-ba, la a yeel-b-la bũmb a ye sẽn tar pãnga. A yeelame: “Gʋls-sõng-kãngã yãmb sẽn wʋm moas-moasã wã paama pidsg rũndã.”—Luk 4:21.

Nebã sẽn wʋm “gom-sõamy nins sẽn dag n yit bãmb noorẽ wã,” ling-b-la wʋsgo, tɩ b ra yet taab yaa: “Ka a Zozɛf biigã wɛ?” A Zeezi sẽn bãng tɩ nebã ratame t’a maan yel-soalem wa a sẽn maan zĩis a taab tɩ nebã tar n gomdã, a yeela woto: “Mam miime tɩ yãmb na n wẽe maam yel-bũn-kãnga: ‘Tɩpa, tɩp f meng f toor n sãooge, la bɩ y maan bũmb nins fãa yãmb sẽn maan Kapɛrnawom tɩ tõnd wʋma, y tẽngẽ ka.’ ” (Luk 4:22, 23) Wõnda a Zeezi ba-yirã rãmb ninga b yamẽ t’a segd n deng n sõnga a tẽngã nebã. Rẽnd tõe tɩ b tagsame t’a Zeezi gomdã paooga bãmba.

A Zeezi sẽn mi b tagsgã, a tẽeg-b-la bũmb kẽer sẽn maan pĩnd wẽndẽ. A yeelame t’a Eli wakatã, pʋg-kõap wʋsg n da be Israyɛlle, la Wẽnnaam ka tʋm a Eli pʋg-kõor baa a yembr nengẽ ye. A tʋm-a-la Sarɛpta pʋg-kõor a ye nengẽ, Sɩdõ soolmẽ wã, t’a tɩ maan yel-solemde, n fãag pagã ne a biigã. (1 Rĩm-dãmbã 17:8-16) No-rɛɛs a Eliize wakatẽ wã me, wãoob wʋsg n da be Israyɛlle, la yaa Siiri rao a Naama bal n paam sãoogre.—2 Rĩm-dãmbã 5:1, 8-14.

Kiba-kãensã a Zeezi sẽn tẽegã wilga a ba-yirã rãmb tɩ yaa bãmb mensã yell bal n pak-ba, la tɩ b ka tẽeb ye. Sẽn da be-b karen-doogã pʋgẽ wã manesem yɩɩ wãna? B sũy puugame, tɩ b yik n veo a Zeezi n yi tẽngã, n tall-a n dʋ tãng ning zug Nazarɛt sẽn ti wã, n na n tus-a t’a lʋɩ. La a Zeezi wẽdga b sʋk n loog tɩ b pa paam-a ye. Rẽ poore, a Zeezi rɩka sor n kẽng Kapɛrnawom sẽn be Galɩle mogrã nug-rɩtg babgã.