Hiwaavo minikwa wi onnakhalawo ohakalala otokweene o Nasareti. Ahaakumve oya opatisiwa ni Yohani iyaakha vakhaani muculi, Yesu aari karpintero wenno. Nyenya vano osuweliwe ntoko mulopwana onapaka miteko sootikhiniha. Achu a vanipuroni aakhalano nchuno na omoona apakaka miteko seiyo variyari vaya.

Nchuno naya ninnaaceereryeya vaavaa Yesu, onayeiye o sinakooka a vanipuroni ntoko yookhovelelaawe. Echu eneeriwa weiwo enaphitaanyerya ovekela ni owaalakhanya aliivuru a Mose, hiiha ntoko eneereyaaya “mahiku aworowa othene musinagoga.” (Saweriwa T’arummwa 15:21) Makupa a aliivuru a alipa miririmu annaalakhanyiwatho. Vaavaa Yesu oneemeleiye wi aalakhanye, owo akhweya onnaasuwela achu ancipale aasuwenleiye ovinyerya elukuluku aaphwanyeyeiye musinakooka yoola. Onnanyiiwa eroolo ya mulipa miririmu Isaiya. Owo onnaphwanya nikupa nenlo nnamuloca Mmoha othanliwe ni munepa waweela wa Yehova, nikupa nenlo olelo nnaphwanyeya mu Isaiya 61:1, 2.

Yesu onnaalakhanya vooloca sa Mmoha yoowo aahaala waalaleerya alipa oowaleliwa, waavaha woona alipa oohoona, ni olaleya elukuluku Yehova onayeiye owoopola achu a nloko nawe. Yesu onnamunnya eroolo yoowo aamunnyale nave onnakiraathi. Achu oothene annamvarerya. Voocharela onnaloca, akhweya evinrevo muneelukuluku, nave sooloca sawe inaphitaanyerya masu ala ookhweleya: “Àhereya olelo masu òrempwa mmanlin’hanyu wiwa.”—Luka 4:21.

Achu annatikhiniheya ni “masu òrèra Yesu alotxeiye,” nave annakohakohana: “Ola tahi mwana a Yosefe?” Nyenya asuwelaka wi anachuna omoona apakaka miteko sootikhiniha ntoko seiyo yiiwalaaya wi oopaka, Yesu onnatitelela oloca: “Eparipari nyuwo munarwa mukilèla nsiphelo nla: namuku wipenuse mukhatà. Sothene niwalahu wenrawe o Kafarnáu, weretho mwelaponi mwà.” (Luka 4:22, 23) Amwaacamani akhalai a Yesu akhweya anoona wi openusa waaphwanela opacerya elapo aya, ntakhara mphurelo wa achu awe. Mwawiihiiha awo akhweya anuupuwela wi Yesu orimwaathanya.

Asuwelaka muupuwelo aya, Yesu onnaromola saweereya ikina mu miyaha sa Isarayeli. Yaahikhalavo anaamukhwele ancipale o Isarayeli variyari va mahiku a Eliya, nyenya Eliya haarumiheliwe wa mmoha a yaawo. Opwaha yeeyo, owo aarumiheliwe wa naamukhwele ahaari mu Isarayeli o Sarefa, epooma waacamela o Sitoni, weiwo Eliya aapankeiyewo yootikhiniha yaavulunse okumi. (1 Mamwene 17:8-16) Nave mmahiku a Eliseu, yaakhalavo anamareca ancipale o Isarayeli, nyenya mulipa a miririmu ampenunse pahi Namani o Siriya.—2 Mamwene 5:1, 8-14.

Achu yaawo anarweela mu epooma emohamoha ya Yesu tiheeni aneeraaya vaava anawiriyanaaya soolikanyiha seiyo sinooniherya nrima ni oyeleela waya nroromelo? Yaawo ari musinakooka annanyeenyeya, annavinya, nave annamukakhela Yesu vaate va epooma. Awo annamukeriha makupa a mwaako weiwo epakiwewo epooma yo Nasareti, nave anneererya omurihela vathi. Nyenya Yesu onnoopowa mmatani mwaya nave onnakophola. Vano Yesu onnaya o Kafarnau, oseresere wa makupa a omokoni a Eniya yo Kalileya.