Ga go pelaelo gore go na le lethabo le legolo kua Natsaretha. Lebakeng la ka godingwana ga ngwaga pele ga ge a ka ya go Johane gore a mo kolobetše, Jesu e be e le mmetli lefelong le. Eupša bjale o tsebja e le monna yo a dirago mediro e matla. Badudi ba fagahletše go mmona a dira mediro ye gare ga bona.

Go fagahla ga bona go a oketšega ge Jesu a eya sinagogeng ya moo, ka ge a tlwaetše go dira bjalo. Tirelo ya moo e akaretša thapelo le go bala dipukung tša Moshe, ka ge go dirwa “disinagogeng ka sabatha e nngwe le e nngwe.” (Ditiro 15:21) Go balwa le dikarolo tša dipuku tša boporofeta. Ge Jesu a emelela gore a bale, mohlomongwe o gopola difahlego tše dintši go tloga nywageng ya ge a be a etla sinagogeng ye. O newa lengwalo la go phuthwa la moporofeta Jesaya. O hwetša moo le bolelago ka Yo a tloditšwego ka moya wa Jehofa, e lego mantšu ao lehono a hwetšagalago go Jesaya 61:1, 2.

Jesu o bala mabapi le kamoo Yo go boletšwego e sa le pele ka yena a tlago go bolela ka go lokollwa ga mathopša, go budullwa ga difofu le go tla ga ngwaga wo o amogelegago wa Jehofa. Jesu o nea mohlokomedi lengwalo la go phuthwa ke moka a dula fase. Mahlo ka moka a mo tsepeletše. Ke moka o a bolela, mohlomongwe lebaka le leteletšana, gomme seo a se bolelago se akaretša mantšu a bohlokwa a rego: “Lehono lengwalo le leo le sa tšwago go le kwa le phethagetše.”—Luka 4:21.

Batho ba kgotsa “mantšu a mabose ao a bego a etšwa molomong wa gagwe,” gomme ba botšana ba re: “Na yo ga se yena morwa wa Josefa?” Eupša ka ge a lemoga gore ba nyaka go bona a dira mediro e matla go swana le yeo ba kwelego ka yona, Jesu o tšwela pele o re: “Ga go pelaelo gore le tla diriša seswantšho se go nna: ‘Ngaka, ikalafe; dilo tšeo re kwelego gore di diregile Kaperenaume di dire le mo seleteng sa geno.’” (Luka 4:22, 23) Go ka direga gore baagišani ba pele ba Jesu ba nagana gore go fodiša go swanetše go thoma ka gae, bakeng sa go hola batho ba gabo pele. Ka gona ba ka nagana gore Jesu o ba phaetše ka thoko.

Ka go lemoga seo ba se naganago, Jesu o bolela ka ditiragalo tše sego kae tša histori ya Isiraele. O hlalosa gore go be go na le bahlologadi ba bantši Isiraeleng mehleng ya Eliya, eupša Eliya ga se a romelwa le go o tee wa bona. Go e na le moo, o ile a ya go mohlologadi yo e sego Moisiraele wa kua Tsarepata, e lego motse wo o lego kgauswi le Sidone, moo Eliya a ilego a dira mohlolo wa go phološa bophelo. (1 Dikgoši 17:8-16) Le gona mehleng ya Elisha, go be go na le balephera ba bantši Isiraeleng, eupša moporofeta o ile a hlwekiša Naamane wa Siria feela.—2 Dikgoši 5:1, 8-14.

Batho ba motseng wa gabo Jesu ba arabela bjang go seo ba ka se tšeago e le dipapišo tše di sa rategego tša histori tšeo di pepentšhago boithati bja bona le go hlaelelwa ga bona ke tumelo? Bao ba lego sinagogeng ba a befelwa ke moka ba emelela gomme ba gogela Jesu ka ntle ga motse. Ba mo iša legageng la thaba yeo Natsaretha e agilwego go yona gomme ba leka go mo kgoromeletša tlase. Eupša Jesu o phonyokga diatleng tša bona gomme o tloga moo a šireletšegile. Bjale Jesu o leba Kaperenaume, lebopong la ka leboabodikela la Lewatle la Galilea.