Jesusqa bautizakusqanmanta wata kurajninman Nazaretman kuterqa. Payqa chay llajtapi wiñakorqa, carpinterotaj karqa. Llajta masisnenqa uyarerqanku Jesús milagrosta ruwayta atisqanta, suyasharqankutaj llajtankupipis chay milagrosta ruwananta. Tukuytaj chayllamanta parlasharqanku.

Samarikuna Pʼunchaypeqa, astawanraj Jesusmanta parlarqanku. Imaraykuchus payqa yachasqa kasqanman jina sinagogaman rerqa. Chay sinagogaspeqa Diosmanta mañakoj kanku, ‘sapa Samarikuna Pʼunchaytaj Moisespa qhelqasqasninta leej kanku’ (Hechos 15:21). Chantapis waj profetaspa qhelqasqankuta leellajtaj kanku. Jesusqa sinagogapi ashkha rejsisqasnintachá rikorqa, imajtinchus payqa wawamantapacha chayman rej. Chantá Jesusqa leej sayarerqa, profeta Isaiaspa kʼuyuna librontataj jaywarqanku. Jesusqa chay librota kʼuyuraspa, Jehová Diospa ajllasqa kamachinmanta parlaj cheqata kicharerqa. Chaytaj Bibliapi kashan Isaías 61:1, 2 versiculospi.

Jesusqa leerqa: ‘Jehová Diosqa ajllawan presosman willanaypaj kacharisqa kanankuta, ciegospis watejmanta qhawarinankuta, Jehová Diospa khuyakunan tiempomantawan willanaypaj’, nispa. Chayta leeytawan, kʼuyuna librota waqaychajman jaywaporqa, tiyaykukorqataj. Sinagogapi kajkunarí, “imatapis nenqapunichá” nispa payta qhawasharqanku. Jesustaj ichapis astawan parlariytawan, nerqa: “Diosmanta Qhelqasqapi chay leesqayqa kunan juntʼakushan”, nispa (Lucas 4:21).

Tukuy chaypi kajkunaqa, Jesús ‘sumajta parlasqanmanta’ tʼukulla kasharqanku. Paykunapurataj ninakorqanku: “¿Manachu kayqa Josejpa wawan?”, nispa. Jesustaj repararqa waj llajtaspi jina milagrosta ruwananta suyashasqankuta. Chayrayku nerqa: “Niwankichejchari kay nisqata: ‘Doctor, qan kikiykita jampikuy. Capernaumpi ashkha imasta ruwasqaykita uyariyku, kay llajtaykipipis chayta ruwallaytaj’, nispa” (Lucas 4:22, 23). Llajta masisnintajrí, ichá yuyarqanku: “Llajta masisnintaraj sanoyachinan karqa á. ¡Imajtintaj wajkunapajraj milagrosta ruwanri!”, nispa.

Jesustaj chayta yachaspa, imaschus unay wataspi kasqanmanta parlarqa. Pay nerqa: ‘Profeta Eliaspa tiemponpi Israelpi ashkha viudas karqanku. Diostajrí Eliastaqa mana chay viudasmanchu kacharqa, manachayqa Sidonpi kaj Sarepta llajtapi tiyakoj viudallaman. Chaypitaj Eliasqa uj milagrota ruwaspa chay viudata, wawantawan yarqhaymanta mana wañunankupaj yanaparqa’, nispa (1 Reyes 17:8-16). Chantá nillarqataj: “Profeta Eliseoj tiemponpipis Israelpi ashkha runas lepra onqoyniyoj karqanku, chaywanpis ni mayqenninku sanoyachisqachu karqa, manachayqa Siriamanta Naamán sutiyoj runalla”, nispa (2 Reyes 5:1, 8-14).

Jesusqa chayta nerqa llajta masisnin pisi creeyniyoj kasqankuta, paykunallapitaj yuyasqankuta reparakunankupaj. Paykunarí, chayta uyarispa mayta rabiakorqanku. Chantá Jesusta llajtamanta orqhorqanku qaqaman tanqaykuspa wañuchinankupaj. Nazaret llajtankoqa chay qaqa patapi karqa. Jesustajrí paykunaj chaupinkuta llojsispa ayqekorqa. Chantá Capernaumman riporqa. Chaytaj Galilea qocha kantupi kasharqa.