Kushii mpaka, musoko ushima wa Nazarete ubadi usaanesaane. Kumpala kwa kipwa na kipindji na Yesu kwenda kwi Yowano bwa shi amubatshishe, Yesu badi asèe mabaaya. Kadi binobino baukibwa bu muntu akitshi bilengyeleshi. Bantu ba mu Nazarete be na lukalo lwa shi akite namu bilengyeleshi bamumone.

Lukalo lwabo lubakamina dingi ngofu nsaa ibabamono Yesu, muyiile kyubishi kyaye, kwete kwenda ku kitumbwilo kyabo kya mu Nazarete. Mwamwa amutungu nkapenda kuteka na kubadika mu mikanda ya Moyiise, bu bibaabadi abakitshi “mu bitumbwilo ku sabato ooso.” (Bikitshino 15:21, Kilombeeno kipya 2014) Ababadikaa dingi bipindji bya mikanda ya matemuki. Nsaa ibayimana Yesu bwa kubadika, badi na mushindo wa kutundula bantu bebungi mwanda badi ebungu nabo. Mmukwate mufungofungo wa mutemuki Yeeshaya. Aye nkumona mbalo y’abakwila Muntu abadi bashingye mwimu kwi Yehowa ku bukwashi bwa kikudi kiselele, uno verse atumupete lelo mu Yeeshaya 61:1, 2.

Yesu abadika pabitale uno Muntu badi mulayibwe by’akaukisha bulungantu bwa be mu lukano, na kuukisha bampofu shi tabadi pa kumona; na kuukisha kufika kwa kipwa kya kalolo ka Yehowa. Yesu batambika mufubi mufungofungo na bashaala. Bantu booso ababanga kumutala. Akupu babangile kwakula, pangi bakwile myanda ibungi, kunyima bakwile ungi mwanda ukata: “Leelo uno kino kifundwe kibeenukumbeena, anwe abekipusha.”—Luka 4:21.

Bantu abakanyine bwa “bishima bibaatukanga mukanwe mwaye,” dingi abadi abeeyipusheena shi: “Awa ta mwana a Yoosefe nyi?” Kadi nsaa ibadi Yesu mushinkamishe shi abakumiina kumona bilengyeleshi bibadi akitshi bu byabya bibabadi bapushe, Yesu batungunukile na kwakula shi: “Takwi mpaka anukangyele luno lukindji shi: ‘Munganga, epaashe obe nabene; kita namu’nyi kuno mwiumbo dienu bintu bioso bibatupusha ambaamba’shi: bibakitshika mu Kapernaume.’” (Luka 4:22, 23, Kilombeeno kipya 2014) Abimweka bu shi bantu ba mu kibundji kyabo abadi abakumiina bwashi Yesu abangye kwibapaasha’bo kwibedi, abande kukwasha mwilo wabo kumpala. Nyi bwakinyi abadya kunangusheena shi Yesu bebalenguula.

P’aye kutundula bibadi binangu byabo, Yesu batemwine ingi myanda ikata ya munshaleelo a beena Isaleele. Kubadi bakashi kilele bebungi mu Isaleele mu mafuku a Eliya, aye nkulesha shi tababadi batume Eliya kwabadi nya. Pa mutwe wa byabya, badi mwende kwi muntu shii mwina Isaleele mukashi kilele a mu Sarepta kibundji kibadi peepi na Sidone, mubadi Eliya mukite kilengyeleeshi kibadi kipaashe myuwa ya bantu. (1 Banfumu 17:8-16) Na mu mafuku a Elisha, kubadi bantu bebungi ba sha-nsudi mu Isaleele, kadi mutemuki badi mupaashe nka penda Naamane mwina Asiriya.—2 Banfumu 5:1, 8-14.

Bano bantu ba mu kibundji kya Yesu abadi bakite naminyi pa mwanda wa uno mwisambo ubadi awibatentekyesha myanda yabo ya kala, awuleesha patooka bubi bwabo bwa kudila kwisangasha na kukutwa kwabo kwa lukumiino? Baba abadi mwamwa mu kitumbwilo abafitshile munda, abo nkwibwa, na nkutuusha Yesu paasha pa kibundji. Abadi bende naye ku nsongo ya mwengye kubabadi bebakye Nazarete, na abo nkutompa kumusukuma mwibanda. Kadi Yesu nkwibafunguka ku maboko aabo na aye nkwibashimina. Akupu badi mwalaale ku efwa dya ku Kapernaume, di kunundu kwa kupona nguba kwa Kalunga ka Ngalileya.