Tikayika cha kuti ŵanthu angukondwa ukongwa Yesu wati wawere ku Nazareti. Kwenuku ndiku wagwiranga ntchitu ya ukalipentala, kweni pa nyengu iyi ndipu pajumpha chaka chimoza kutuliya po Yohane wangumubatiziya. Kweni sonu, ŵanthu anandi amuziŵanga kuti ndi munthu yo wachitanga vinthu vanthazi ndipuso vakuziziswa. Ŵanthu a ku Nazareti akhumbisiskanga kuwona Yesu wachichita vakuziziswa.

Yesu wati waluta ku sinagogi nge mo wachitiyanga nyengu zosi, ŵanthu anandi alindizganga kuti wachitengi vakuziziswa. Mwambu uwu ungwamba ndi pempheru ndipu pavuli paki, wanguŵerenga mabuku ngaku Mozesi nge mo vachitikiyanga “mumasinagogi pa sabata peposi.” (Machitidu 15:21) Pa mwambu uwu, aŵerenganga so vigaŵa vinyaki va mabuku nga achimi. Yesu wati wama kuti wayambi kuŵerenga, tikayika cha kuti wanguziŵa ŵanthu anandi wo wakumananga nawu pa nyengu yo wazanga ku sinagogi mwenuyu. Pavuli paki, angumupaska mpukutu wa mchimi Yesaya. Ndipu wangusaniya po pakambanga vakukwaskana ndi Munthu yo wakusankhika ndi mzimu waku Yehova. M’Bayibolu mazu ngenanga ngasanirika pa Yesaya 61:1, 2.

Yesu wanguŵerenga vakukwaskana ndi mo Munthu mwenuyu wazamupharazgiya kufwatulika kwa ŵanthu wo akukoleka ukapolu, kujula masu ŵanthu achibulumutiya, kweniso kuza kwa chaka chakuzomerezeka chaku Yehova. Yesu wati wamaliza, wangupereka mpukutu uwu kwa munthu yo wateŵetiyanga musinagogi, pavuli paki wanguja pasi. Ŵanthu wosi angumulereska dodoli. Pavuli paki, wangulongoro kwa nyengu yitaliku ndipu mazu nganyaki ngo wangukamba ngakuti: “Msanawale lemba ili lo mwavwa, lafiskika.”—Luka 4:21.

Ŵanthu anguzizwa ukongwa ndi “mazu ngakukondwesa ngo ngatuwanga pamulomu paki,” ndipu angwamba kufumbana kuti: “Asi ndi mwana waku Yosefi uyu?” Kweni Yesu wati waziŵa kuti ŵanthu yaŵa akhumbanga kuti waŵachitiyi vakuziziswa nge vo anguvwa kuti wanguchita muvigaŵa vinyaki, wangulutirizga kukamba kuti: “Nadi panu mwazakundikambiya ntharika yakuti, ‘Dokotala, jichizgi! Vinthu vo tavwa kuti wachitanga ku Kaperenao uvichiti so kunu kumuzi kwaku.’” (Luka 4:22, 23) Panyaki ŵanthu ŵenaŵa awonanga kuti vatingi vijengi umampha asani Yesu wangwamba kuchizga ŵanthu akumuzi waki. Kweni chifukwa chakuti wanguchita ivi cha, yiwu awonanga kuti waŵachitiya chipongu.

Yesu wati waziŵa vo ŵanthu yaŵa aŵanaŵananga, wanguŵakambiya vinthu vo vinguchitika mu nyengu ya Ayisirayeli. Wanguŵakambiya kuti mu nyengu yaku Eliya, mu Isirayeli mwenga vyoko vinandi kweni Eliya wangutumika ku vyoko venivi cha. M’malu mwaki, wanguluta kwa choko cho chajanga ku Zarefati. Tawuni yeniyi, yenga kufupi ndi Sidoni ndipu kwenuku ndiku Eliya wanguyuska mwana wa munthukazi mwenuyu. (1 Ŵakaronga 17:8-16) Kweniso mu nyengu yaku Elisha, mu Isirayeli mwenga ŵanthu anandi wo atamanga makhati, kweni mchimi uyu wanguchizga Namani pe wa ku Siriya.—2 Ŵakaronga 5:1, 8-14.

Kumbi ŵanthu ŵenaŵa anguchitanji ŵati aziŵa kuti vo Yesu wangukamba vingulongo kuti yiwu ŵenga akujiyanja kweniso ŵengavi chivwanu? Ŵanthu wosi wo ŵenga musinagogi angukwiya ukongwa ndipu angusoka ndi kutuzgiya Yesu kubwalu kwa tawuni mwaliŵiliŵi. Anguluta nayu pachanya paphiri po panguzengeka tawuni ya Nazareti, ndipu akhumbanga kumuponya ku chinkhwawu. Kweni Yesu wanguporota mukati mwawu ndi kuthaŵa. Pavuli paki, iyu wanguluta ku Kaperenao, chakunkhondi kwa Nyanja ya Galileya.