E mautinoa eiloa me ne ua‵te a tino katoa i Nasaleta. A koi tuai o fanatu a Iesu ke papatiso a ia ne Ioane i se tausaga tupu ko teka atu, ne fai eiloa a Iesu mo fai se kamuta i konā. Kae nei la, ne lauiloa a ia e pelā me se tino telā e fai ne ia a vavega. Ko oko eiloa i te fia lavea ne tino i te fa‵kai tenā ke fai ne ia a nisi galuega konei i mua o latou.

Ne momea aka eiloa te lotou ‵nofo fakatali‵tali i te taimi ne fanatu ei a Iesu e pelā mo tena masani ki te sunako i konā. Ne aofia i te faiga o te sauniga i konā a te ‵talo mo te faitauga mai i tusi a Mose, e pelā mo mea e fai “i loto i sunako i sapati katoa.” (Galuega 15:21) Ne faitau atu foki a nisi vaega o tusi fakapelofeta. I te taimi ne tu atu ei a Iesu ki luga o faitau, kāti ne masaua eiloa ne ia a foliga o tino e tokouke mai i tausaga ne fanatu sāle ei a ia ki te sunako tenei. Ne tuku atu ki a ia a te pelugā tusi a te pelofeta ko Isaia. Ne maua ne ia te vaega i ei e uiga ki te Tino e fakaekegina ki te agaga o Ieova, telā e maua i aso nei i te Isaia 61:1, 2.

Ne faitau atu a Iesu e uiga ki te Tino telā ka talai atu ne ia a te fakasaolotoga o tino kolā e ‵nofo pologa, te faka‵pulaga o mata o tino ‵kivi, mo te tausaga o te loto ‵lei o Ieova. Ne fakafoki atu ne Iesu te pelugā tusi ki te tino tausi, kae ne nofo ei a ia ki lalo. Ne pula ‵toka atu a mata o tino katoa ki a ia. Kae ne toe faipati atu a ia, kāti mai i se koga ‵mao, kae ne aofia eiloa i tena fakamatalaga a pati tāua konei: “Ko fakataunu i te aso nei a mea i te tusi telā ne fatoa fakalogo‵logo koutou ki ei.”—Luka 4:21.

Ne ōfo masei a tino i “te ‵gali o pati kolā ne ‵to mai i tena gutu,” kae ne fai aka latou penei i a latou eiloa: “E se ko ia tenei te tama a Iosefa?” Ona ko te mea e iloa ne Iesu me ne ma‵nako latou ke fai ne ia a galuega ‵mana e pelā mo mea ne lagona ne latou, ne toe fai atu a ia penei: “E seai se fakalotolotolua me ka fakauiga ne koutou a pati konei ki a au: ‘Te tokita, ke faka‵lei ne koe a koe eiloa. A mea kolā ne ‵logo matou i Kapanaumi, ke fai foki ne koe i tou fa‵kai tonu.’” (Luka 4:22, 23) Kāti ne ma‵natu aka a tuakoi mua o Iesu me ne ‵tau o kamata te faka‵leiga o masaki i tena fa‵kai, ko te mea ke aoga muamua ki ana tino. Tela la, kāti ne mafau‵fau latou me ne seki amanaia a Iesu ki a latou.

Ona ko te mea ne iloa ne Iesu olotou mafaufauga, ne taku atu ne ia a nisi mea ne ‵tupu i tala mua o te kau Isalaelu. Ana muna, me e tokouke a fāfine kolā ne ‵mate olotou avaga i Isalaelu i aso o Elia, kae ne seki uga atu a Elia ki a latou. I lō te fai penā, ne fanatu a ia ki te fafine telā e sē se tino Isalaelu i Salefata, se fa‵kai e pili ki Saitonu, telā ne fai i ei ne Elia se vavega fakaola tino. (1 Tupu 17:8-16) Kae i aso o Elisaia, ne tokouke ‵ki eiloa a lepela i Isalaelu, kae ne faka‵lei fua ne te pelofeta a Naamanu te tagata Sulia.—2 Tupu 5:1, 8-14.

Ne ‵saga atu pefea a tino konei mai te fa‵kai o Iesu ki mea ne lavea ne latou e pelā me ne tala mua sē ‵lei kolā ne fakatusa‵tusa atu ki a latou kae ne fakaasi faka‵sau mai foki i ei te lotou kaima‵nako mo te sē lava o te lotou fakatuanaki? Ne kaitaua a tino konā i te sunako, ne ta‵fuke aka ki luga kae ne ave mālō ne latou a Iesu ki tua mo te fa‵kai. Ne avatu ne latou a ia ki te kaugutu o te mauga telā ne tu ei a Nasaleta, kae ne taumafai latou o ‵pei a ia ki lalo. Kae ne sola keatea a Iesu mai i a latou, kae ne sao faka‵lei atu eiloa a ia. Ne fanatu ei a Iesu ki Kapanaumi, i te feitu ki matū togala o te matafaga o te Tai o Kalilaia.