Sigurado nga nalipay gud an mga tawo ha Nazaret. Antes bumaya hi Jesus basi magpabawtismo kan Juan mga sobra usa ka tuig na an naglabay, usa hiya nga panday dinhi. Pero yana kilala na hiya sugad nga magburuhat hin mga milagro. Karuyag na gud han iya mga kahimungto nga makita nira mismo an pipira han iya mga milagro.

Mas nalipay pa gud hira han kumadto hi Jesus ha sinagoga, sugad han iya nabatasan. An katirok didto nag-uupod han pag-ampo ngan pagbasa ha mga libro ni Moises, sugad han ginbubuhat ha ‘kada sabbath ha mga sinagoga.’ (Buhat 15:21) Ginbabasa liwat an pipira nga bahin han mga libro han tagna. Pagtindog ni Jesus basi magbasa, posible nga damu an iya nakita nga kakilala tungod han damu ka tuig nga iya pagkinadto hito nga sinagoga. An linukot nga basahon ni propeta Isaias iginhatag ha iya. Katapos, nabilngan niya an asoy mahitungod han Usa nga dinihogan pinaagi han baraan nga espiritu ni Jehova, nga mababasa yana ha Isaias 61:1, 2.

Ginbasa ni Jesus kon paonan-o ini nga Usa nga igintagna magsasangyaw mahitungod ha kagawasan han mga bihag, ha pagpahiuli han pagkita han mga buta, ngan han tiarabot nga panahon diin makakarawat utro an mga bendisyon ni Jehova. Katapos, iginbalik niya an linukot nga basahon ha kabulig ngan liningkod. Nagkinita ha iya an ngatanan nga tawo. Katapos nagyakan hiya, posible hin mauruiha, upod inin importante nga mga pulong: “Yana nga adlaw natuman ini nga kasuratan nga iyo pa la nabatian.”—Lucas 4:21.

Nahipausa an mga tawo ha “makaruruyag nga mga pulong nga nagawas ha iya baba,” ngan hira nagsiring: “Diri ba anak hiya ni Jose?” Pero tungod kay maaram hi Jesus nga karuyag nira makakita hin mga milagro sugad han ira hinbatian, hiya nagpadayon: “Sigurado nga ako an iyo ginhuhunahuna hini nga puplunganon: ‘Doktor, tambala an imo kalugaringon,’ ngan masiring kamo ha akon: ‘Hinbatian namon an imo ginbuhat ha Capernaum, salit buhata liwat ito dinhi ha imo lugar.’” (Lucas 4:22, 23) Posible nga para ha mga amyaw ni Jesus hadto, an iya pagpanambal sadang tikangan ha iya lugar basi an iya mga kahimungto an siyahan nga magpahimulos. Salit ginhunahuna nira nga ginbalewaray hira ni Jesus.

Maaram hi Jesus han ira ginhuhunahuna salit nag-unabi hiya hin pipira nga panhitabo ha kasaysayan han Israel. Hiya nagsiring nga damu an balo ha Israel ha panahon ni Elias, pero hi Elias waray sugoa ngadto ha ira. Lugod, ginpakadto hiya ha diri Israelita nga balo ha Sarepat, ha bungto hirani ha Sidon, diin nagbuhat hiya hin milagro nga nagtalwas hin kinabuhi. (1 Hadi 17:8-16) Ngan ha panahon ni Eliseo, damu an may leprosi ha Israel, pero hi Naaman la nga taga-Sirya an gintambal han propeta.—2 Hadi 5:1, 8-14.

Ano an reaksyon hini nga mga kahimungto ni Jesus tungod han ira ginhuhunahuna nga diri maopay nga pagtanding nga nagbuhayhag han ira kahakog ngan kawaray-pagtoo? An mga nakadto ha sinagoga nasina, nanindog, ngan ira gindara hi Jesus ngadto ha gawas han syudad. Ira gindara hiya ha pangpang han bukid nga hinmumutangan han Nazaret, ngan nangalimbasog paghulog ha iya. Pero nakapalagiw hi Jesus ngan talwas nga binaya. Yana tipakadto na hiya ha Capernaum, ha norte-weste nga baybayon han Dagat han Galilea.