KAPITE 21
ʼI Te Sinakoka ʼi Nasaleti
-
ʼE LAU E SESU IA TE TAKAIGA TOHI ʼA ISAIA
-
ʼE FAIGAʼI E TE HAHAʼI ʼO NASALETI KE NATOU MATEHI IA SESU
ʼE mahino ia neʼe gatutu te kolo ʼo Nasaleti. ʼI muʼa ʼo te alu ʼa Sesu ke papitemaʼi ia ia e Soane, kua hili ki ai he taʼu katoa, neʼe ko he tagata tufuga ʼakau pe ia. Kaʼe ʼi te temi nei kua iloʼi leva ia ia ko he tahi ʼe fai milakulo. Pea ko te hahaʼi ʼo te kolo kua natou fakaʼamu ke natou sisio ki hana fakahoko he ʼu milakulo.
Ohage pe ko tana agamahani, neʼe alu ia Sesu ki te sinakoka. Neʼe fakaʼamu te hahaʼi ke natou sisio ki he milakulo. Neʼe fai ai te ʼu faikole pea neʼe lau ai ia te ʼu tohi ʼa Moisese ohage ko tona fai “ ʼi te ʼu sinakoka ʼi te sapato fuli.” (Gaue 15:21) Pea neʼe toe lau ai foki mo te ʼu tohi ʼa te kau polofeta. ʼI te tuʼu ake ʼa Sesu ʼo lautohi, neʼe ʼavage kia te ia te tohi ʼa te polofeta ko Isaia. a Neʼe ina maʼu te faʼahi ʼae ʼe talanoa ai kia Ia ʼae neʼe fakanofo ʼaki te laumalie ʼo Sehova, ʼae ʼe tuʼu ʼi te temi nei ia Esaia 61:1, 2. Neʼe ina iloʼi te tokolahi koteʼuhi neʼe haʼu tuʼumaʼu ki te sinakoka lolotoga he ʼu taʼu.
Pea neʼe hoko atu e Sesu tana lautohi, ʼae ʼe ui ai ʼo ʼuhiga mo Ia ʼaia, ʼe ina fakamafola ia te ʼateaina ki te kau popula, mo fakamalolo te kau kivi pea mo faifakamafola ʼi te temi faigamalie ke natou maʼu ai te ʼofa ʼo Sehova. Pea neʼe fakatoʼo age e Sesu ia te takaiga tohi ki te tagata gaue ʼo te sinakoka pea heka leva ia. Neʼe sioʼi fakamamaʼu leva ia ia e te hahaʼi fuli. Pea neʼe palalau leva, lagi ʼi he temi loaloaga, ʼo ina fai te ʼu palalau maʼuhiga ʼaeni: “ ʼI te ʼaho nei, kua hoko te folafola ʼaeni neʼe kotou logo mai ki ai.”—Luka 4:21.
Neʼe punamaʼuli te hahaʼi “ ʼi te ʼu lea malie ʼae neʼe ina puʼaki mai,” pea neʼe natou feuiʼaki fenei: “ ʼE mole koa la ko he foha ʼo Sosefo?” Kaʼe neʼe tokagaʼi e Sesu neʼe fia sisio te hahaʼi ki hana fai ia he ʼu milakulo, ohage ko te ʼu milakulo ʼae neʼe natou logo ki ai. Koia, neʼe hoko atu fenei e Sesu: “ ʼE mahino ia, ʼe kotou fakaʼuhiga anai te takuga lea ʼaeni kia au: ‘Toketa, fakamalolo ia koe. Fai ʼi tou fenua totonu te ʼu meʼa ʼae neʼe matou logo neʼe ke fai ʼi Kapenaume.’ ” (Luka 4:22, 23) Maʼa te hahaʼi ʼo te kolo ʼo Sesu, neʼe tonu muʼa ke ina fakamalolo ia natou ke fua lelei ai kia natou. Neʼe feala pe ke natou manatu neʼe meʼa noaʼi natou e Sesu.
ʼI te iloʼi e Sesu ia tanatou manatu, neʼe ina fakamatala age ia he ʼu aluʼaga ʼo te hisitolia ʼo Iselaele. Neʼe fakamanatuʼi age e Sesu kia natou, ʼi te temi ʼo te polofeta ko Elia, neʼe lahi ia te ʼu fafine vitua ʼi Iselaele, kaʼe neʼe mole fekauʼi ia te polofeta ki he tahi ia natou. Neʼe ina fekauʼi ia ki he fafine vitua neʼe mole Iselaele neʼe nofo ʼi Salepeta b ko he kolo ʼe tuʼu ovi ki Sitone, c ʼae neʼe fakahoko ai e Elia ia he milakulo. (1 Hau 17:8-16) Pea ʼi te temi ʼo Eliseo, neʼe kaugā malie te kau kilia ʼi Iselaele kaʼe neʼe fakamaʼa pe e te polofeta Naamane te tagata Silia.—2 Hau 5:1, 8-14.
Neʼe lagi manatu ia te hahaʼi ʼo te kolo ʼo Sesu neʼe ina fai te ʼu fakamatala ʼaia moʼo valokiʼi ʼo tanatou manatu pe ʼae kia natou totonu pea mo tanatou tui vaivai. Kotea leva ʼae neʼe natou fai? Ko natou ʼae neʼe ʼi te sinakoka neʼe natou iita leva. Pea natou tutuʼu ake ʼo taki ia ia ki te tuʼa kolo. Neʼe natou ʼave ia ia ki te mata mato ʼae neʼe laga ai ia Nasaleti, pea neʼe natou faigaʼi ke natou li ifo mai ai. Kaʼe neʼe hao ia Sesu mai ia natou. Pea neʼe alu leva ia ki Kapenaume, ʼae ʼe tuʼu ʼi te potu noleto uesite ʼo te Tai ʼo Kalilea.