Nazaretankirinakajj Jesusar jiwayañ munapkäna uka qhepatjja, jupajj qota jakʼankir Capernaúm markaruw sarjjäna, uka qotajj “Genesaret qota” sasin uñtʼatarakïnwa (Lucas 5:1). Ukhamatwa Isaías libron qellqatäkäna uka profeciajj phoqasïna, ukansti sänwa: ‘Galileankir qota jakʼan jakasirinakajj mä jachʼa qhanwa uñjapjjani’ sasa (Isaías 9:1, 2).

Galilea toqenjja, Jesusajj “alajjpachankir Reinojj jakʼankjjewa” sasin yatiyaskakïnwa (Mateo 4:17). Jupampi chika nayrïr kutin sarnaqapkäna uka pusi discipulonakaparuw Jesusajj jikjjatäna. Uka discipulonakajj Judeat Jesusampi kuttʼanjjapjjäna ukhaw utanakaparojj chawlla katuri kuttʼjjapjjäna (Juan 1:35-42). Ukampis jichhajj Jesusampiw sapür sarnaqapjjañapäna, ukhamatwa Jesusajj Diosan arunakap yatiyapjjañapatakejj wakichtʼaspäna. Jupajj alajjpachar sarjjañapäna uka qhepatjja, jupanakaw yatiyasipkakiñapäna.

Jesusajj Galilea Qota laknam saraskäna ukhajja, Simón Predrompiru, Andrés jilapampiru, chawlla katur yaqha masinakapampiruw qänanakap tʼajjsuskir jikjjatäna. Pedron botepar sarjjatasinjja, mä jukʼa jitheqtayam sasaw säna. Jitheqtayäna ukhajja, botetpachwa Jesusajj qontʼasisin qota lakankasipkäna uka jaqenakarojj Diosan Reinopat yatichäna.

Ukatjja Jesusajj Pedror akham sarakïnwa: “Jichhasti aka botjja jukʼamp manqha toqer apam, chawlla katuñatak qänanakam qotar jaqontapjjam” sasa. Pedrojj sarakïnwa: “Yatichiri, nanakajj arum paqaraw chawlla katuñatak chʼam tukupjjta janiw kuns katupkti, ukampis arunakamar istʼasaw qänanak jaqontäjja” sasa (Lucas 5:4, 5).

Qänanakap jaqontapjjäna ukhajja, jupanakajj walja chawllanakwa katupjjäna, qänanakapas tʼaqartarakïnwa. Ukhamasti mayni botenkir chawlla katuri masinakaparuw amparamp jawsapjjäna, ukhamat yanaptʼayasiñataki. Jutapjjäna ukhajja, paypach botenakaruw chawllanak phoqtʼayapjjäna, uka botenakas umar chhaqantirjamänwa. Uk uñjasasti Jesusan nayraqataparuw Pedrojj killptʼasïna, ukatjja sarakïnwa: “Tata, jan jakʼachasistati, nayajj jucharar jaqëtwa” sasa. Jesusasti Pedror sänwa: “Jan ajjsaramti, jichhat uksarojj jaqenakaruw jakkirpach katüta” sasa (Lucas 5:8, 10).

Ukatjja Pedrompiru Andresampirojj Jesusajj akham sänwa: “Nayar arkapjjeta, nayasti jaqenak katuri tukuyapjjäma” sasa (Mateo 4:19). Qhepatjja, Jesusajj Santiagompiru Juanampiruw jawsarakïna, jupanakajj Zebedeon yoqanakapänwa, chawlla katuripjjarakïnwa. Jupanakasti ukaratpachaw chawlla katuñ negociop jaytasajj jan pächasis Jesusar arkapjjäna, sapüruw Jesusamp sarnaqapjjarakïna.