Omu vatu vamuNazaleta vasakile kujiha Yesu, ayile kunganda yaKapelenau yize yapwile kwakamwihi naKalungalwiji waNgalileya uze vavulukilenga nawa ngwavo “chijiva chaNgenesaleta.” (Luka 5:1) Echi chateselemo upolofweto wamumukanda waIsaya uze wavulukile ngwavo vatu vamuNgalileya vaze vatwaminenga kwakamwihi nakalungalwiji navakamona kumunyika chachinene.—Isaya 9:1, 2.

Yesu atwalileho lika kuvilika muNgalileya ngwenyi: “Wangana wamelu unapandama kwakamwihi.” (Mateu 4:17) Yesu awanyine tumbaji twenyi vawana. Hakavanga vatambukilenga nenyi, oloze omu vakindulukile hamwe naYesu kufuma kuYuleya, vaputukile kuzata cheka milimo yavo yakuta vaishi. (Yowano 1:35-42) Halwola kanelu vatelele jino kupwanga naYesu lwola lwosena mangana avanangule mwakuzachila mulimo mwakavasela omu mwakaya mwilu.

Omu Yesu apwile nakutambuka kungenge yakalungalwiji, amwene Shimona Petulu nandumbwenyi Andelei, navakwavo veka vali nakukosa moji avo. Yesu ayile nakwingila muwato waPetulu nakumulweza asosolole wato ufume kungenge yakalungalwiji. Kaha Yesu atwamine muwato nakuputuka kunangula mayongomena avatu vaze valikungulwilile kungenge yakalungalwiji muchano waWangana.

Kufumaho, Yesu alwezele Petulu ngwenyi: “Twala wato kuze kwakukunama, kaha futenu moji enu mukwate vaishi.” Petulu akumbulwile ngwenyi: “Ove Muka-kunangula, tunafulyangila ufuku wosena, kaha katwajihile ishi numba umweko. Oloze kweseka namazu ove nangufuta moji.”—Luka 5:4, 5.

Vafuchile moji avo kaha vakwachile vaishi vavavulu chikuma, kaha moji avo aputukile kumbitwojoka. Valwezele malunga vapwile muwato ukwavo vezenga washi mangana vavakafweko. Hahaze vene mato osena avali azalile navaishi, kaha vaputukile kuvomba. Omu Petulu amwene chuma kana, alimbilile kumambuli aYesu nakwamba ngwenyi: “Ove Mwata, fuma kuli ami, mwomwo ami ngumuka-shili.” Yesu amukumbulwile ngwenyi: “Kanda nawivwa womako. Kufuma vene oholili naufutanga vatu.”—Luka 5:8, 10.

Yesu alwezele Petulu naAndelei ngwenyi: “Ngukavangizenunga, kaha nangumilingisa kupwa muvaka-kuta vatu.” (Mateu 4:19) Asanyikile nawa malunga vavali vaka-kuta vaishi, vaYakova naYowano, vana vaZevete. Navakiko vetavilile chakuzeneka kukwata kumashinde. Ngachize, ava malunga vawana vasezele mulimo wavo wakuta vaishi nakuputuka jino kukavangiza Yesu lwola lwosena.