Bihaen pipol bilong Nazareth trae for killim Jesus dae, hem go stap long Capernaum, klosap long Sea long Galilee, wea nara nem bilong hem, “Lake long Gennesaret.” (Luke 5:1; footnote) Diswan fitim profesi long buk bilong Isaiah wea sei pipol wea stap long saed sea long Galilee bae lukim wanfala laet wea braet tumas.—Isaiah 9:1, 2.

So long Galilee nao Jesus gohed for talem pipol “Kingdom bilong God hem kam klosap nao.” (Matthew 4:17) Jesus go lukaotem fofala disaepol bilong hem. Olketa hia gogo witim Jesus bifor long Judea, bat bihaen, olketa go bak long fishing bisnis bilong olketa. (John 1:35-42) Bat hem taem nao for olketa followim Jesus full taem mekem hem savve trainim olketa for gohed long preaching waka bihaen hem lusim olketa.

Taem Jesus wakabaot followim saedsea, hem lukim Simon Peter and brata bilong hem Andrew, witim olketa nara man for fishing wea wasim net bilong olketa. Jesus go insaed boat bilong Peter and askem hem for tekem boat hia go aot lelebet from shore. Then Jesus hem sidaon and start for teachim pipol wea hipap long saedsea olketa tru samting abaotem Kingdom.

Bihaen, Jesus sei long Peter: “Tekem boat hia go long ples wea hem deep, and putim go net bilong iufala long sea for kasem fish.” Bat Peter hem sei: “Teacher, mifala waka hard for full naet gogo mifala no kasem eni fish, bat bae mi daonem olketa net hia olsem iu talem.”—Luke 5:4, 5.

Olketa duim datwan and kasem staka fish, gogo olketa net start for brek nao! Semtaem nomoa, olketa kolem kam olketa wea stap long nara boat for helpem olketa. Olketa fulimap tufala boat hia, gogo olketa boat klosap sink daon nao. Taem Peter lukim diswan hem nildaon front long Jesus and sei: “Lord, iu go from mi, bikos mi man wea sin.” Jesus sei long Peter: “Iu no fraet. Start long disfala taem, bae iu fishing for kasem pipol.”—Luke 5:8, 10.

Jesus sei long Peter and Andrew: “Kam followim mi. Mi bae teachim iufala hao for fishing for kasem pipol.” (Matthew 4:19) Hem kolem kam nara tufala man for fishing, James and John, wea dadi bilong tufala hem Zebedee. Tufala hia tu lusim evri samting and go followim hem. So fofala man hia lusim fishing bisnis bilong olketa and olketa nao first wan for followim Jesus full taem.