Nazaretpi llaqtamasinkuna wañurachiyta munaptinkum Jesusqa Capernaunmanña ripukurqa, chayqa karqa Galilea lamar quchapa utaq “Genesaret quchapa” patanpim (Lucas 5:1). Chaynapim ‘Galilea lamar quchapa patanpi kaqkuna hatun achkita rikunankumanta’ niq willakuy cumplikurqa (Isaias 9:1, 2).

Chay llaqtapipas Jesusqa hinallam willakurqa ‘Diospa munaychakuynin hichpamusqanmanta’ (Mateo 4:17). Chaypiqa kaqllam tawa qatiqninkunawan tuparurqa. Paykunaqa Judea lawpi Jesuswan kasqankumanta kutispallankum llamkayninkuman kutikurqaku (Juan 1:35-42). Chay kutipim ichaqa Jesusta mana saqiykuspaña qatinanku karqa, chaynapi allin yachachisqa kaspa Jesus manaña kaptin Diosmanta hinalla willakunankupaq.

Quchapa patanta purispanmi Jesusqa Simon Pedrowan, wawqin Andreswan hinaspa wakinwanpas tuparurqa. Paykunam challwa hapina mallankuta mayllachkasqaku. Jesusñataqmi Pedropa botenman qispiruspan nirqa quchapa patanmanta karunchananpaq. Karu niqpi kaspanñataqmi tiyaykuspan quchapa patanpi runakunaman Diosmanta yachachirqa.

Chaymantam Pedrota nirqa: “Botekita ukuniqman yaykuchiy hinaspa mallaykichikta mastaychik challwata hapinaykichikpaq”, nispa. Pedroñataqmi nirqa: ‘Yachachikuq, tukuy tuta challwaspaykupas manam chullallatapas hapinikuchu, ichaqa nisqaykiraykuyá mallata mastarusaq’, nispa (Lucas 5:4, 5).

Chayta ruwaspam Pedrowan wakinqa achkallaña challwata hapirurqaku mallankupas llikirinankama. Chaymi wakin challwaqmasinkunata yanapanankupaq qayakurqaku, hinaptinmi manapas unayllapi iskaynin boteña huntaruspan yaqaña yakuman chinkaykurqa. Chayta qawaspanmi Pedroqa Jesuspa ñawpaqninpi qunqurakuykuspan nirqa: “Señor ñuqamanta asurikuy, ñuqaqa kani huchasapa runam”, nispa. Jesusñataqmi nirqa: “Ama manchakuychu, kunanmantapacham runakunataña challwanki”, nispa (Lucas 5:8, 10).

Chaymantam Jesusqa Pedrotawan Andresta nirqa: “Qatiwaychik, runakunataña challwanaykichikpaqmi yachachisqaykichik”, nispa (Mateo 4:19). Hina chaynallatam nirqa Zebedeopa churin Santiagotawan Juantapas, paykunapas challwaspam llamkaqku. Chaymi tawanku llamkayninkuta saqispanku Jesustaña mana saqispa qatirqaku, paykunawanmi Jesusqa puntata purirqa.