Na peko ti so azo ti Nazareth aye ti fâ lo, Jésus ague na Capernaüm, mbeni gbata so ayeke nduru na Kota ngu ti Galilée so a iri ni nga “kota ngu ti Gennésareth”. (Luc 5:1). Ye so asara si prophétie so ayeke na mbeti ti Ésaïe aga tâ tënë, so a tene fade azo so ayeke na tere ti ngu ni so ayeke bâ ande kota lumière.—Ésaïe 9:1, 2.

Na Galilée nga kue Jésus angbâ ti fa na azo so “Royaume ti yayu aga nduru awe.” (Matthieu 4:17). Jésus awara tere na ambeni disciple ti lo osio. Lo na ala ague lani na Judée, me gi na peko ti so ala na lo alondo kâ akiri ge, ala kiri na tere ti angbene kua ti ala ti gingo susu (Jean 1:35-42). Me fadeso, ngoi ti tene ala ngbâ na tere ti Jésus lakue lakue alingbi awe, tongaso si lo lingbi ti fa ye na ala, si na pekoni ala lingbi ti bâ lege ti kua ni na peko ti lo.

Na ngoi so Jésus angbâ ti tambela na yanga ti ngu ni, lo bâ Simon Pierre na ita ti lo André, nga na ambeni mba ti ala, so angbâ ti sukula agbanda ti ala. Jésus ague na tere ti ala na lo monté na yâ ti ngö ti Pierre, na lo tene na lo ti gue na ngö ni kete na lê ti ngu. Tongana ala hon ayo kete, Jésus aduti na lo komanse ti fa atâ tënë ti Royaume na azo mingi so abungbi na tere ti ngu ni.

Na pekoni, Jésus atene na Pierre, lo tene: “Pusu ngö ni na ndo so ngu ni alï, na ala bi agbanda ti ala ti gbu asusu.” Pierre akiri tënë, a tene: “Maître, e bâ pasi na bï so kue na e wara ye oko ape. Me so mo mû yanga, mbi yeke bi agbanda ni.”—Luc 5:4, 5.

Tongana ala bi agbanda ni, ala gbu gbâ ti susu juska agbanda ni akomanse ti suru! Hio, ala tene na amba ti ala, so ayeke na yâ ti mbeni ngö so ayeke na tere ti ala, ti ga ti aidé ala. Me hio, yâ ti angö ni use kue asi na susu juska a sara si angö ni akomanse ti lï ngu. Na bango ye ni so, Pierre atï na devant ti Jésus na lo tene: “Seigneur, hon yongoro na tere ti mbi, ndali ti so mbi yeke wasiokpari.” Me Jésus atene na lo, a tene: “Zia ti sara mbeto. A to nda ni laso, mo yeke ga zo ti gingo azo.”—Luc 5:8, 10.

Jésus atene na Pierre na André, lo tene: “Ala mû peko ti mbi, na mbi yeke sara si ala ga azo ti gingo azo.” (Matthieu 4:19). Lo tene nga tënë ni so na Jacques na Jean, amolenge ti Zébédée, so ala yeke nga ambeni zo ti gingo susu. Ala nga kue ayeda sân ti ku. Tongaso, akoli so adö kua ti ala ti gingo susu azia, na ala ga akozo adisciple so amû peko ti Jésus lakue lakue.