Ka mor’a hore batho ba Nazaretha ba leke ho bolaea Jesu, o ea Kapernauma haufi le Leoatle la Galilea leo hape le bitsoang “letša la Genesarete.” (Luka 5:1) Taba ena e phethahatsa boprofeta ba Esaia ba hore batho ba Galilea ba lulang pel’a leoatle ba tla bona leseli.​—Esaia 9:​1, 2.

Le mona Galilea, Jesu o phatlalatsa hore “ ’Muso oa maholimo o atametse.” (Matheu 4:​17) Jesu o kopana le barutuoa ba hae ba banè. Ba ne ba tsamaea le eena pejana eaba ha a khutlela Judea bona ba khutlela mosebetsing oa bona oa ho tšoasa litlhapi. (Johanne 1:​35-42) Hona joale, ba lokela ho lula ba e-na le Jesu e le hore a ka ba koetlisetsa hore ba tle ba khone ho tsoela pele ka mosebetsi oa ho ruta ha a se a le sieo.

Ha Jesu a ntse a tsamaea lebopong, o bona Simone Petrose le mor’abo e leng Andrease hammoho le metsoalle e meng ea bona ba ntse ba hlatsoa matlooa. Jesu o ea ho bona, o palama sekepe sa Petrose, ha a qeta o mo kopa hore a se ise hare. Ha ba se ba le sebakanyana, Jesu o lula fatše ’me o qala ho ruta letšoele le lebopong ka ’Muso.

Ka mor’a moo, Jesu o re ho Petrose: “Se hulele moo ho tebileng, ’me le theolele matlooa a lona tlaase hore le tšoase.” Petrose ha a araba o re: “Morupeli, re sehlile bosiu bohle ’me ra se ke ra tšoasa letho, empa ka taelo ea hao ke tla theola matlooa.”​—Luka 5:​4, 5.

Ba theola matlooa ’me ba tšoasa litlhapi tse ngata hoo matlooa a bona a tabohang. Kapele-pele ba hoehla basebetsi-’moho le bona ba sekepeng se haufi hore ba tl’o ba thusa. Ho e-s’o ee kae, likepe tsena tse peli li tlala tsoete! hoo joale li qalang ho teba ka lebaka la boima ba litlhapi. Ha Petrose a bona sena, o itihela ka pel’a Jesu o re ho eena: “Morena, tloha ho ’na, hobane ke monna ea nang le sebe.” Leha ho le joalo, Jesu o re ho eena: “Khaotsa ho ba le tšabo. Ho tloha joale ho ea pele u tla tšoasa batho ba phela.”​—Luka 5:​8, 10.

Jesu o re ho Petrose le Andrease: “Ntšaleng morao, ’me ke tla le etsa batšoasi ba batho.” (Matheu 4:​19) O bitsa batšoasi ba litlhapi ba bang ba babeli e leng Jakobo le Johanne, bara ba Zebedea. Le bona ba mo sala morao ba sa tsila-tsile. Barutuoa bana ba banè ba siea khoebo ea bona ea ho tšoasa litlhapi ’me ba sebetsa le Jesu kamehla.