Nuumala Yesu otthyawa oNazarethi mwaha wa atthu ale yaaphavela omwiiva, owo aahirowa oKafarnawu. Muttetthe ole waattamenle Ephareya ya oGalileya, yeeyo-tho yiihaniwa “Genesaré”. (Luka 5:1) Eyo yaahikhaliherya wiiraneya wa eprofesia ya Yesaya, yaahimya wira atthu a oGalileya yaakhala waattamela ephareya yaarowa woona waarya wuulupale.​—Yesaya 8:23; 9:1.

Nto oGalileya Yesu aahivikaniha olaleya wira: “Omwene wa wirimu ori vakhiviru!” (Matheyo 4:17) Vano Yesu aahaaphwanya awiixutti awe axexe. Awo yaatoko weetta ni Yesu, masi nuumala orowa oYudeya ni Yesu, yaahitthikela muteko aya woototha ihopa. (Yohani 1:35-42) Nto ole waari okathi wira akhaleke ni Yesu okathi wotheene wira owiixuttihe muteko woolaleerya ohinatthi orowa wiirimu.

Vaavo Yesu eetta awe okerekhere wa ephareya, aahinweha Simoni Pedru, Andreya ni atthu akina yaatathana aya itthavi. Yesu aahiwela ekalawa ya Pedru, onanvekela wira osusiherye vakhaani mmaasini. Nuumala osusiha vakhaani, Yesu aahikilaathi onapacerya wiixuttiha ikeekhai sa Omwene muttitthi ole aakilanthe okerekhere.

Nuumala-vo, Yesu aahimuleela Pedru wira: “Murowé eríyari, eri màsi manjene, murihele matthavi anyu mmàsini, mutotheke”. Pedru aakhunle so: “Pwiya, nokukhumuwa ohiy’ula wothene, khuhivar’etthu. Vano, okhala wira nyuwo mohimya, kinorihela-tho matthavi mmàsini”.​—Luka 5:4, 5.

Nto, yaahirihela matthavi aya mmaasini khuvara ihopa sinceene, mpakha matthavi aya opacerya okhereya! Mowaakuveya, yaahiwiihana akhwaaya yaari ekalawa ekina wira yaakhaliherye. Moohipisa ikalawa iye saahisarya ihopa mpakha opacerya osama. Vaavo Pedru oonale awe eyo, aahikokhora ohoolo wa Yesu khumuhimeerya wira: “Pwiya, nvenyé va varyaka, mana miyo ki natampi”. Yesu aahimwaakhula wira: “Muhòvé! Okhuma olelo vava munokhala mutothi àtthu”.​—Luka 5:8, 10.

Yesu aahimuleela Pedru ni Andreya wira: “Mukitthareke: kinimokhalihani atothi àtthu”. (Matheyo 4:19) Nave Yesu aahimulattula Yakobo ni Yohani aana a Zebedeyo. Awo yaahaakhulela. Tivonto, alopwana ale axexe yaahihiya muteko aya woototha akhala awiixutti oopacerya a okathi wotheene a Yesu.