Katapos nga gin-ikaparatay hi Jesus han mga taga-Nazaret, kinadto hiya ha syudad han Capernaum hirani ha Dagat han Galilea, nga gintatawag liwat nga “linaw han Genesaret.” (Lucas 5:1) Katumanan ini han tagna ha libro ni Isaias nga an mga tawo ha Galilea nga naukoy hirani ha dagat makakakita hin daku nga kapawa.—Isaias 9:1, 2.

Oo, dinhi ha Galilea padayon nga iginpasamwak ni Jesus nga “an Ginhadian han langit hirani na.” (Mateo 4:17) Nakita ni Jesus an upat han iya mga disipulo. Kaupod-upod niya hira hadto, pero pag-uli nira tikang ha Judea, binalik hira ha ira negosyo nga pangisda. (Juan 1:35-42) Pero panahon na nga pirme hira makaupod ni Jesus basi mabansay niya hira nga maipadayon an ministeryo kon waray na hiya.

Samtang naglalakat hi Jesus ha baybayon, nakita niya an magbugto nga hira Simon Pedro ngan Andres, pati an pipira han ira kaupod nga naglilimpyo hin pukot. Dumaop ha ira hi Jesus, sinakay ha baluto ni Pedro, ngan naghangyo nga ighurohirayo ito ha baybayon. Katapos, lumingkod hi Jesus ngan nagtutdo mahitungod han kamatuoran han Ginhadian ha mga tawo nga nakada ha baybayon.

Kahuman, hi Jesus nagsiring kan Pedro: “Dad-a ha hilarom an baluto, ngan ihulog an iyo mga pukot basi makadakop.” Hi Pedro binaton: “Magturutdo, ha bug-os nga gab-i nangalimbasog kami kondi waray kami nadakop, pero tungod han imo ginsiring, ihuhulog ko an mga pukot.”—Lucas 5:4, 5.

Iginhulog nira an pukot ngan nakadakop hin damu hinduro nga isda salit nagtikang ito magisi! Nagsinyas dayon hira ha ira mga kaupod ha kahirani nga baluto nga kumadto ha ira basi bumulig. Waray pag-iha, napuno hin isda an ira mga baluto salit nagtikalunod ito. Han makita ini ni Pedro, lumuhod hiya ha atubangan ni Jesus ngan nagsiring: “Ginoo, diri ako takos humirani ha imo, kay makasasala ako nga tawo.” Hi Jesus binaton: “Ayaw na kahadlok. Tikang yana mangingisda ka hin buhi nga mga tawo.”—Lucas 5:8, 10.

Ginsidngan ni Jesus hira Pedro ngan Andres: “Sunod kamo ha akon, ngan hihimoon ko kamo nga parapangisda hin mga tawo.” (Mateo 4:19) Ginsidngan liwat niya hito an duha pa nga parapangisda, hira Santiago ngan Juan, nga mga anak ni Sebedeo. Sumunod liwat hira dayon. Salit ginbayaan hini nga upat an ira negosyo nga pangisda ngan nagin siyahan nga bug-os-panahon nga mga disipulo ni Jesus.