Le ka tsʼoʼok u púutsʼul Jesús tiʼ le máakoʼob óolak kíimsik tu kaajil Nazaretoʼ bin tu kaajil Capernaum, naatsʼ tiʼ u kʼáaʼnáabil Galilea, kʼaj óolaʼan xaneʼ «u jaʼil Genesaret» (Lucas 5:1). Lelaʼ tu béeykuntaj u profecíail Isaías tuʼux ku yaʼalikeʼ u kajnáaliloʼob Galilea yanoʼob naatsʼ tiʼ le kʼáaʼnáaboʼ yaan u yilkoʼob junpʼéel nojoch sáasil (Isaías 9:1, 2).

Bey túunoʼ Jesuseʼ seguernaj u kʼaʼaytik tu luʼumil Galilea: «U Reinoil kaʼaneʼ tsʼoʼok u náatsʼal» (Mateo 4:17). Jesuseʼ kʼuch yiknal kantúul u disipuloʼob. Letiʼobeʼ tsʼoʼok u yáax láakʼintikoʼob Jesús. Baʼaleʼ le ka lukʼ Jesús Judeaeʼ, letiʼobeʼ tu seguertaj u chuk kayoʼob, le meyaj ku beetkoʼob kaʼachoʼ (Juan 1:35-42). Beoraaʼ tsʼoʼok u kʼuchul yorail u seguertik u máanoʼob yéetel Jesús utiaʼal u kaʼansaʼaloʼob u beetoʼob le meyaj kun pʼatbil tiʼob ken xiʼikoʼ.

Le táan u máan Jesús tu jáal le kʼáaʼnáaboʼ, tu yilaj Simón Pedro yéetel Andrés, u yíitsʼin, bey xan jujuntúul tiʼ u yéet meyajoʼob táan u pʼoʼik u redil u chuk kayoʼob. Jesuseʼ naʼak tu barco Pedroeʼ ka tu yaʼalajtiʼ ka u jutsʼuba junpʼíit ichil le jaʼoʼ. Ka kulaj ichileʼ ka joʼopʼ u kaʼansik le baʼaxoʼob ken u beet le Reino tiʼ le máaxoʼob u muchʼmubaʼob tu jáal le jaʼoʼ.

Ka tsʼoʼokeʼ Jesuseʼ tu yaʼalaj tiʼ Pedro: «Bis le barco tak teʼ tuʼux taamoʼ, ka a puleʼex a redeʼexiʼ, utiaʼal ka chuuknakeʼex». Pedroeʼ tu núukajtiʼ: «J-Kaʼansaj, bul áakʼab meyajnajoʼon baʼaleʼ maʼ t-chukaj mix baʼaliʼ, baʼaleʼ tumen teech aʼalikeʼ nikaʼaj in pul le redoʼoboʼ» (Lucas 5:4, 5).

Ka tu puloʼobeʼ tu chukoʼob yaʼab kayoʼob, ka joʼopʼ u jáatal u redoʼob. Tu séebaʼanileʼ tu béechʼkʼabtoʼob le uláakʼ máakoʼob yanoʼob tuláakʼ barco utiaʼal ka áantaʼakoʼoboʼ. Tu kaʼapʼéelal le barcoʼob túunoʼ chuʼupoʼob ka joʼopʼ u búululoʼob. Ka tu yilaj Pedro lelaʼ tu yaʼalaj tiʼ Jesús: «Yuumtsil, náachkuntaba tiʼ teen, tumen kʼeban wíiniken». Jesuseʼ tu núukajtiʼ: «Maʼ a chʼaʼik saajkil. Desde bejlaʼeʼ yaan u káajal a chukik máakoʼob kuxaʼanoʼob» (Lucas 5:8, 10).

Jesuseʼ tu yaʼalaj tiʼ Pedro yéetel tiʼ Andrés: «Koʼoteneʼex tin paach, ka in beeteʼex j-chuk wíinikoʼob» (Mateo 4:19). Letiʼeʼ tu tʼanaj uláakʼ kaʼatúul j-chuk kayoʼob, Santiago yéetel Juan, u paalaloʼob Zebedeo. Tu séebaʼanileʼ binoʼob xan tu paach. Le kantúul máakoʼobaʼ tu pʼatoʼob u chuk kayoʼobeʼ ka joʼopʼ u tsaypachtikoʼob Jesús sáamsamal.