Despué de gucalaʼdxiʼ ca binni de Nazaret ñuuticaʼ Jesús, yendeza ndaaniʼ guidxi Capernaúm, gaxha de nisadóʼ stiʼ Galilea o «lago stiʼ Genesaret» (Lucas 5:1). Zacá guca cumplir profecía stiʼ Isaías ni ná, zuuyaʼ ca binni de Galilea ni nabeza gaxha de nisadóʼ ti biaaniʼ roʼ (Isaías 9:1, 2).

Cadi cusaana Jesús de guiníʼ, ndaaniʼ guidxi Galilea, «maʼ bidxiña Reinu ni nuu guibáʼ» (Mateo 4:17). Bidxelaʼ Jesús tapa discípulo stiʼ lu región riʼ. Maca biʼniʼ viajarné ca hombre riʼ Jesús, peru ora bibiguétacabe Judea la? bibiguetaʼ ca discípulo riʼ lu negocio de benda sticaʼ (Juan 1:35-42). Peru maʼ bedandá ora chinándacabe Jesús ladu tiica cheʼ para gusiidiʼ laacabe, ti gúnicabe xhiiñaʼ Dios ora maʼ qué guinni.

Laga zizá Jesús guriá nisadóʼ que, biiyaʼ caguiibiʼ Simón Pedro, Andrés, biʼchiʼ, ne xcaadxi xcompañérucaʼ chin sticaʼ. Para bidxiña Jesús laacabe ne gudxiʼbaʼ ndaaniʼ canuá stiʼ Pedro ne gúdxibe laa guxhelehuiiniʼ canuá que de ruaa nisa. Guyuusícabe zituhuiiniʼ, gurí Jesús ne bizulú bisiidiʼ guiráʼ binni nuu ruaa playa que ca noticia galán stiʼ Reinu.

Despué, gudxi Jesús Pedro: «Biʼniʼ remar dede ra ziáʼ, ne lagusaba chin stitu para guinaazetu benda». Peru bicabi Pedro: «Maestru, guidubi gueelaʼ bínidu dxiiñaʼ nadipaʼ ne qué nináʼzedu gastiʼ; peru cumu lii caniʼluʼ ni la? zusabaʼ ca chin riʼ» (Lucas 5:4, 5).

Ora biʼniʼ Pedro né ca ni nuu raqué ni ná Jesús la? gunaazecaʼ stale benda dede careza ca chin sticaʼ. Nagueendaca bíʼnicabe seña ca ni nuu ndaaniʼ sti canuá que, para gueeda gacané laacabe. Qué nindaa, bidxá tipa guiropaʼ canuá que ne dede cayaaziʼ ni. Ora biʼyaʼ Pedro ni cazaaca riʼ, biaba xañee Jesús ne ná: «Bixeleʼ de naa Señor, purtiʼ nacaʼ ti hombre pecador». Peru Jesús gudxi laabe: «Maʼ cadi guidxíbiluʼ. Dede yannadxí zácaluʼ pescador de binni» (Lucas 5:8, 10).

Despué, gudxi Jesús Pedro ne Andrés: «Latananda naa, ne zuneʼ laatu pescador de binni» (Mateo 4:19). Laaca bidii Jesús invitación riʼ xhupa pescador nuu raqué, Santiago ne Juan, xiiñiʼ Zebedeo ca hombre riʼ. Gucuaa guidapaʼ hombre riʼ invitación que, ne oraqueca bisaanacaʼ negocio de benda sticaʼ ne gúcacaʼ ca primé discípulo stiʼ Jesús ne yanna zinándacaʼ Jesús ra tiica cheʼ.