Zezi in envit Pyer, Andre, Zak ek Zan, son kat disip pour lapes dimoun. Zour Saba, zot tou zot al dan sinagog Kapernaoum. Zezi i ansenny dan sinagog e ankor enn fwa tou dimoun i vreman etonnen par son fason ansennyen. I pa ansenny zot parey bann profeser lalwa me i ansenny zot sa ki sorti kot Bondye.

Sa menm zour Saba, en zonm ki posede par demon i la dan sinagog. I kriye: “Ki ou’n vin fer isi ou, Zezi sa Nazareen? Ou’n vin isi pour detri nou? Mon konn tre byen lekel ou, ou sa Enn ki Sen sorti kot Bondye.” Zezi i koz severman avek sa demon ki pe kontrol sa zonm. I dir li: “Reste trankil e sorti dan sa zonm!”​—Mark 1:24, 25.

Ler sa demon i tann sa, i kriy avek tou son lafors e fer sa zonm tonm kriz. Me sa demon i sorti dan sa zonm “san fer li okenn dimal.” (Lik 4:35) Tou dimoun otour li i etonnen! Zot demande: “Kisisa sa? . . . I menm annan lotorite pour donn lord bann demon e zot obei li.” (Mark 1:27) Alor, i pa drol ki nouvel konsernan sa ki’n arive i fann partou dan Galile.

Zezi ek son bann disip i kit sinagog e al kot Simon, ki osi ganny apele Pyer. Laba belmer Pyer i vreman malad avek en gro lafyev. Zot sipliy Zezi pour ed li. Alor Zezi i al kot li, pran son lanmen e fer li leve. I ganny geri deswit e i konmans servi Zezi ek bann disip ki avek li. Petet i menm prepar en repa pour zot.

Ler soley i kouse, dimoun sorti partou kote i vin kot lakour Pyer avek bann dimoun ki malad. Dan en pti moman, i paret ki tou dimoun dan lavil in rasanble devan son laport. Akoz? Zot anvi ganny geri. Anfet, ‘tou sa bann ki i annan dimoun malad avek tou sort maladi i anmenn zot kot li. I poz lanmen lo sakenn ant zot e geri zot.’ (Lik 4:40) Parey i ti’n ganny predir, Zezi i kapab geri nenport ki kalite maladi. (Izai 53:4) I menm sas bann demon. Ler i fer sa, sa bann demon i kriye: “Ou Garson Bondye.” (Lik 4:41) Me Zezi i koz avek zot severman e i pa les zot koz ankor. Zot konnen ki Zezi i Kris e i pa anvi ki zot donn lenpresyon ki zot pe servi Zeova.