I Kapernaum, Yésu ni banigil bé ba-na ba bak ba pégi kel yosôna. Kôkôa, bôt ba Kapernaum ba nlona nye bakokon bap le a mbuubaha bo. Yésu a bagna ndigi ndék ngéda inyu yé.

I kegla i noñ ha, jiibe li bak li ngi yii, Yésu a mpam nyetama. A nyéñ homa nu a yé nwee inyu soohe Isañ. Ndi Yésu a mba nyetama inyu ndék ngéda. Kiki banigil bé ba nôgda le a ta bé, “Simôn ni ba ba yé lôñni nye” ba mbôdôl yéñ Yésu. Bebek Pétrô nyen a nlama ba bisu inyule i mbai yé nyen Yésu a bak.​—Markô 1:36; Lukas 4:38.

Kiki ba nléba Yésu, Pétrô a nkal le: “Bôt bobasôna ba yé i yéñ we.” (Markô 1:37) Ni maliga, bôt ba Kapernaum ba gwé ngôñ le Yésu a yégle ni bo. Ba ngwés mam Yésu a mboñ, inyu hala nyen ba noode “kéñ nye njel le a ke bañ homa numpe.” (Lukas 4:42) Baa jam li bisu Yésu a nlôl i nkoñ isi li yé le a boñ bihélha bi mam inyu mélés makon ma bôt? Baa nson wé u nlama ndik sôk ha libôga li? Kii nyemede a nhoñol mu jam li?

Yésu a ntimbhe banigil bé le: “Di kenek homa numpe, ikété bitison bi yé hana ipañ inyu boñ le yak nyoo me téé likalô, inyule inyu hala nyen me bi lôl.” Ibabé pééna, Yésu a nkal i bet ba ngwés le a yégle le: “Me nlama ki añle bitison bipe ñañ nlam u Ane Nyambe; inyule inyu hala nyen Nyambe a bi om me.”​—Markô 1:38; Lukas 4:43.

Ñ, Yésu a bi lo ndugi nkoñ isi inyu añal ñañ nlam u Ane Djob. I Ane i, i ga téé jôl li Isañ lipubi, i mélés ki makon mélés yosôna. Mu kiki a mélés bôt ni nhélha njel, Yésu a ñunda toi le Nyambe nyen a ñom nye. Ngandak nwii i bisu bi ngéda, Môsi a bi boñ bihélha bi mam inyu unda le ni toi Djob nyen a bi ep nye.​—Manyodi 4:1-9, 30, 31.

Yésu a nyodi i Kapernaum inyu ke téé likalô mambok mape, banigil bé ba-na ba nke ni nye. Bon ba yé Pétrô ni manyañ Andréa yak ni Yôhanes ni manyañ Yakôbô. Hala a yé sonde yada le Yésu a bi naña bo i ba basolôñ bé.

Likalô li Yésu ni banigil bé ba-na i Galiléa li num ngandak matam malam! Ibabé pééna, ñañ inyu Yésu u nke haa. “Jôl jé li ke ni Siria yosôna,” yak ikété nkoñ u jôm li bitison i Dékapôli, ni ii pes ipe i Lom Yordan. (Matéô 4:24, 25) Mamut ma minkoñ mi ni ma Yudéa ma noñ Yésu ni banigil bé. Ngandak i nlona nye bôt ba gwé ngôñ i mbôôp. Yésu a nwéha bé bo nyuu, a mélés makon, a mpémés yak mimbuu mimbe mi yé ikété bôt.