Melu Yésus a te lôt e Capernaoum a beyé’é bé benyine me mbe teke awo’on. Mame ngô’é, bôte ya Capernaoum be nga zu minkôkone miap asu na a saé mie. Yésus a nji kui na a bi ja’a ve mon awo’on.

Nde Yésus a kôlô si ndibe tyé éyoñe mone dibi a ngenan, a kui nseñ. A ke vôm a ne tabe étam asu na a ye’elan Ésa wé. Ve a nji kui na a tabe étam ayap. Éyoñe ba yemelane na a nji beta bo, ‘Simon a bôt ba be nye be to’ ba tôñe Yésus. Pierre nnye a yiane bo ôsu amu nne Yésus a mbe nda jé.​—Marc 1:36; Luc 4:38.

Éyoñe ba koone Yésus, Pierre nye na: “Bôte bese be ajeñe wo.” (Marc 1:37) Bi ne wô’ô amu jé bôte ya Capernaoum ba yi na Yésus a tabe valé. Ba ve fo’o nya akéva amu mam a te bo, nde ba jeñe na be “bi nye na a bo te kandane be.” (Luc 4:42, Mfefé Nkôñelan) Akusa bo nalé, ye jam ôsu Yésus a nga so de si é mbe na a zu saé bôt a zene ya mesimba mete? Ye nde a yiane su’u ésaé jé ve valé? Émien a jô aya mfa’a ôte?

Yésus a yalane beyé’é bé na: “Nkelane minlam mife mi ne ôsu, amu me aye fe kate foé wôé; ajô te nde me nga zu de.” Yésus a kate fe bôte ba yi na a tabe valé na: “Me ayiane ke minlam mife, a kate bôt mbamba foé ya ayoñe Zambe: amu ajô te nde Zambe a nga lôme ma.”​—Marc 1:38; Luc 4:43.

Ôwé, beta amu Yésus a te so si va a ne na, a zu kañete bôt Éjôé Zambe. Éjôé éte ja ye fubu éyôlé Zambe a mane vaa akon ese da ndeñele bone be bôt. Nge Yésus a bo mesimba a saé fe bôt, a ne asu na a liti na Zambe nnye a nga lôme nye. Aval ete da, mintete mimbu mvuse, Moïse a nga bo beta be mam asu na be yeme na Zambe nye a nga lôme nye.​—Nkôlan 4:1-9, 30, 31.

Ane Yésus a kôlô Capernaoum na a ke kañete bitison bife, a beyé’é bé benyin ba ke a nye. Beyé’é benyine bete be ne Pierre a monyañe wé André, ja’a fe Jean ba monyañe wé Jacques. Sondô ya mvus, Yésus a nga bañete be na be bo bôte ba ye taté saé a nye.

Ésaé nkañete Yésus a beyé’é bé ba bo mbôma’ane a Galilée ja wume fo’o abui bibuma. Nde fe, nkañete Yésus ô nga kui ôyap a yiane vôm ase. “Duma dé e nga yiane Siri ase,” e si ya bitison awôm ba loone na Décapole, a mfa’a ya Jourdain yat. (Matthieu 4:24, 25, Mfefé Nkôñelan) Abui bôte ya bevôme bete aval fe ane ba ya Judée, da tôñe Yésus a beyé’é bé. Abui bôte da zu minkôkon e be nye na a saé mie. Yésus a nji titane be: a saé minkôkon a vaa mimbia minsisim e be ba mimbia minsisim mi mbe mi to be nyul.