Zezi ek son kat disip in byen okipe pandan lazournen Kapernaoum. Aswar, bann dimoun Kapernaoum i anmenn bann ki malad kot li pour li geri zot. Zezi pa’n ganny bokou letan li tousel.

Aprezan, son lannmen granmaten, ler i ankor fernwanr, Zezi i leve e i al deor li tousel. I rod en landrwa izole kot i kapab priy son Papa an prive. Me Zezi pa reste bokou letan tousel. Ler ‘Simon ek lezot ki avek li’ i realize ki Zezi pa la, zot al rod li. I kapab ki se Pyer ki pran linisyativ pour rod Zezi akoz Zezi ti kot li.​—Mark 1:36; Lik 4:38.

Ler zot trouv Zezi, Pyer i dir: “Tou dimoun pe rod ou.” (Mark 1:37) I fer sans ki bann dimoun Kapernaoum i oule ki Zezi i reste. Zot vreman apresye sa ki i’n fer, alor zot esey “anpes li ale.” (Lik 4:42) Par kont, eski Zezi ti vin lo later prensipalman pour fer bann mirak pour geri dimoun? Deplis, eski i pou fer tou son bann aktivite zis dan sa landrwa? Ki Zezi i dir konsernan tousala?

Zezi i reponn son bann disip: “Annou al en lot landrwa, dan bann lavil pros, pour ki mon kapab pres laba osi parski se pour sa rezon ki mon’n vini.” Anfet, Zezi i menm dir avek bann ki pe esey anpes li ale: “Mon bezwen anons bon nouvel Rwayonm Bondye dan lezot lavil osi parski se pour sa ki mon’n ganny anvoye.”​—Mark 1:38; Lik 4:43.

Anfet, rezon pli enportan ki Zezi in vin lo later, se pour pres konsernan Rwayonm Bondye. Sa Rwayonm pou sanktifye non son Papa e rezourd tou problenm imen pour touzour. Zezi i montre ki Bondye ki’n anvoy li par fer bann mirak pour geri dimoun. Dan menm fason, plizyer santenn lannen avan sa, Moiz ti’n fer bann mirak pour montre ki i ti’n ganny anvoye par Bondye.​—Egzod 4:1-9, 30, 31.

Alor Zezi i kit Kapernaoum pour pres dan lezot lavil e son kat disip i al avek li. I avek Pyer ek son frer Andre e osi Zan ek son frer Zak. Son semenn avan, zot ti’n ganny envite pour partisip dan predikasyon avek Zezi.

Kanpanny predikasyon Zezi avek sa kat disip in byen reisi! Anfet, nouvel konsernan Zezi i “fann partou atraver Siri,” dan sa dis lavil ki apel Dekapol e ziska lot kote Larivyer Zourden. (Matye 4:24, 25) Bann gran lafoul sorti dan sa bann landrwa e osi sorti Zide i swiv Zezi ek son bann disip. En kantite dimoun i anmenn bann ki bezwen ganny geri kot li. Zezi pa dezapwent zot, i geri bann ki malad e i sas bann demon.