MWAKORO 24
E Karababaa Ana Mwakuri ni Minita i Kariraia
MATAIO 4:23-25 MAREKO 1:35-39 RUKA 4:42, 43
-
E MWAMWANANGA IESU I KARIRAIA MA TAAN RIMWINA AKE AMAN
-
E A TANOATA ATAAKIN ANA UARONGORONGO MA ANA MWAKURI
Bon te bong ae rangi n tabetabe iai Iesu i Kaberenaum ma taan rimwina ake aman. N te tairiki ao a uotiia aoraki kaaini Kaberenaum bwa e na kamarurungia. E bon uarereke ana tai Iesu n tiku n tii ngaia.
E a karangaina ngkai n te bong are imwina ao e tuai n oota raoi, ao e a nako Iesu n tii ngaia nakon te tabo ae akea kaaina. E a kunea te tabo teuana are e na tataro iai nakon Tamana. Ma e kimototo ana tai Iesu aei bwa ngke a ataia “Timon ma naake raona” bwa ai akea ao a a kakaaea. Tao e bae ni kairiri Betero ibukina bwa e mena Iesu ni mwengana.—Mareko 1:36; Ruka 4:38.
Ngke a a kunea Iesu ao e taku Betero: “A bane n ukoukoriko aomata.” (Mareko 1:37) E teretere bwa a tangira Iesu kaaini Kaberenaum bwa e na tiku i rarikia. A rangi ni kukurei ni baike e a tia ni karaoi ngaia are a “taua bwa e na aki nako mairouia.” (Ruka 4:42) Ma te koaua bwa e roko i aon te aba bwa e na karaoi kakai ma ni katoki aoraki? E na tii karaoi ana mwakuri n te tabo aei? Tera ana taeka iai?
E kaekaia taan rimwina Iesu ni kangai: “Ti a nako nakon taabo tabeua riki, nakoni kaawa aika uakaan, bwa I aonga n uarongorongo naba iai, bwa ngaia aei bukin nakomaiu.” E bon tuangia naba aomata ake a tangiria bwa e na tiku ngke e kangai: “I riai naba n tataekina te rongorongo ae raoiroi ae taekan ana Tautaeka n Uea te Atua nakoni kaawa ake tabeua, bwa ngaia aei bukini kanakoau.”—Mareko 1:38; Ruka 4:43.
Eng, anne oini bukin rokona i aon te aba bwa e na uarongorongoa taekan ana Tautaeka n Uea te Atua. E na katabua aran Tamana te Tautaeka n Uea anne ao a nang katokaki aia kangaanga aomata nako. E anga kakoauaan ae e boni kanakoaki mairoun te Atua ngke e katoki aoraki n te kakai. N aron naba anne n tienture aika nako, e karaoi kakai Mote ni kaotia bwa ngaia temanna are e kanakoaki iroun te Atua.—Te Otinako 4:1-9, 30, 31.
Ngaia are a a kitana ngkai Kaberenaum Iesu ma taan rimwina ake aman n uarongorongo ni kaawa ake tabeua riki. Naakai boni Betero ma tarina are Anterea ao Ioane ma tarina are Iakobo. E kaoia n te wiki are mai mwaina bwa a na riki bwa raona ni moani mwananga ao ni mwakuri.
E nakoraoi ana uarongorongo Iesu ma taan rimwina ake aman i Kariraia! Ni koauana, e a tanoata ao n ataaki rongorongon Iesu. “E taonaanako Turia rongorongona” n aononi kaawa ake tebwina are Tekabori, ao ni kabutaa iteran te Karaanga are Ioretan. (Mataio 4:24, 25) A a iraki ngkai Iesu ma taan rimwina irouia mani kaawa ake tabeua, ao mai Iutaia. A bati ake a uotiia aoraki bwa a na kamarurungaki irouna, ma e aki bwara nanona irouia. E kamarurungia aoraki ao e kanakoia taamnei aika buakaka mairouia naake a taniaki n te taimonio.