Jesu avọ ilele ene riẹ a jọ Kapaniọm serihọ vievie he evaọ ẹdẹ nana. Nọ u te obọ owọwọ no, ahwo Kapaniọm a tẹ wọ ahwo rai nọ e be mọ ze re o siwi ai. Jesu o wo oke ovo kẹ omobọ riẹ hẹ.

Evaọ irioke frifri ọrọ ẹdẹ nọ o lele i rie nọ oke u ri vẹ hẹ, Jesu ọ tẹ kpama kpobọ otafe. O te kpohọ oria nọ ohwo ọvo ọ rrọ họ re ọ lẹ se Ọsẹ riẹ. Rekọ Jesu ọ jọ etẹe kri hi. Nọ ahwo nọ a jọ uwou na a ruẹ nọ Jesu ọ rrọ uwou na ha, “Saemọn avọ enọ e jọ kugbei” a te mu Jesu họ ẹgwọlọ. Ẹsejọhọ Pita họ ọnọ ọ karo evaọ onya na keme uwou riẹ Jesu o wohọ.—Mak 1:36; Luk 4:38.

Nọ a ruẹ Jesu no, Pita ọ tẹ ta nọ: “Ahwo kpobi a be gwọlọ owhẹ.” (Mak 1:37) Ahwo Kapaniọm a gwọlọ nọ Jesu ọ gbẹ jọ kugbe ai. Iruo igbunu nọ Jesu o ru e were rai gaga, fikiere “a tẹ jẹ gwọlọ whaha iẹe re ọ siọ ae ba ẹnya seba.” (Luk 4:42) Kọ iruo igbunu họ ugogo oware nọ o wọ Jesu ziọ otọakpọ? Kọ ẹwho nana ọvo ọ te jọ ru iruo riẹ? Eme Jesu ọ ta kpahe onana?

Jesu ọ ta kẹ ilele riẹ nọ: “Joma kpohọ oria ọfa, ewho nọ e kẹle onana, re mẹ jọ obei ta usi uwoma na re, keme fiki onana mẹ rọ nyaze.” Jesu ọ tubẹ ta kẹ ahwo nọ a jẹ gwọlọ whaha iẹe ẹnyavrẹ na inọ: “O gba omẹ họ nọ me re whowho usi uwoma Uvie Ọghẹnẹ kẹ ewho efa re, keme fiki onana a ro vi omẹ ze.”—Mak 1:38; Luk 4:43.

Evaọ uzẹme, ugogo oware nọ o wọ Jesu ziọ otọakpọ na họ re ọ ta usiuwoma Uvie Ọghẹnẹ. Uvie yena u ti ru odẹ Ọsẹ riẹ fo je si ebẹbẹ akpọ kpobi no. Iruo igbunu nọ Jesu o je ru na i dhesẹ vevẹ nọ Ọghẹnẹ o vi rie ze. Epọvo na o jọ evaọ ikpe buobu taure a te ti yẹ Jesu. Mosis o ru eware igbunu ro dhesẹ nọ Ọghẹnẹ họ ọnọ o vi rie.—Ọnyano 4:1-9, 30, 31.

Fikiere Jesu o te no Kapaniọm kpohọ ewho efa nyae ta usiuwoma na, yọ ilele ene riẹ e jọ kugbei. Ilele ene na họ Pita avọ oniọvo riẹ Andru, gbe Jọn avọ oniọvo riẹ Jemis. Oka nọ o vrẹ Jesu o zizie i rai re a jọ ilele ọsosuọ riẹ nọ a re gbe kpohọ oria kpobi.

Emamọ iyẹrẹ i no iruo usiuwoma ota nọ Jesu avọ ilele ene riẹ a ru evaọ Galili na ze. Evaọ uzẹme, usi Jesu u do te oria kpobi. “Usi riẹ u te do ruọ Siria soso,” te ẹkwotọ jọ nọ o wo ikpewho ikpe nọ a re se Dẹkapọlis, je te abọdekọ Jọdan. (Matiu 4:24, 25) Ogbotu buobu a zurie no eria nana gbe Judia ze, a te mu Jesu avọ ilele riẹ họ elele. Ahwo buobu a rọ ahwo rai nọ e be mọ ze re o siwi ai. Jesu o ru oware nọ a gwọlọ kpobi kẹ ae, o siwi enọ e be mọ je le izi igbegbe no enọ izi igbegbe e rrọ oma.