Yesũ na amanyĩw’a make ana nĩmatethisye wĩa mwingĩ mũno mũthenya ũla maĩ Kavelinaumi. Me o kũu, ĩa-mawĩoo andũ nĩmaetie awau moo nĩ kana amavosye. Na kwoou Yesũ ndaĩ na ĩvinda yingĩ ũtonya kwĩthĩwa e weka.

Mũthenya ũla waatĩĩe, Yesũ nĩwookĩlile kwakya tene na athi nza e weka nũndũ endaa kwĩthĩwa vandũ vauĩtye. Nĩwoonie vandũ vauĩtye vala waĩ atonya kũmũvoya Ĩthe wake. Ĩndĩ ũndũ ũsu weethĩiwe o kwa kavinda kanini. Yĩla “Simoni na ala waĩ namo” mamanyie kana Yesũ nde vakuvĩ, nĩmambĩĩie kũmũmantha na kĩthito. Nĩvatonyeka Vetelo akethĩwa no we watongoesye ala mamũmanthaa Yesũ, kĩtumi nũndũ Yesũ aĩ mũsyĩ kwa Vetelo.—Maliko 1:36; Luka 4:38.

Yĩla mamwonie Yesũ, Vetelo amwĩie atĩĩ: “Kĩla mũndũ nũkũũmantha.” (Maliko 1:37) Ti ũndũ wa ũsengy’a kũmanya kana andũ ma Kavelinaumi mendaa Yesũ ekalange namo. Nũndũ ĩkomano nĩyatanĩthiw’e mũno nĩ maũndũ ala Yesũ weekie kĩsionĩ kyoo, nĩyatatie “kũmũsiĩĩa ndakayĩtie.” (Luka 4:42) Ĩndĩ ĩkũlyo nĩ, ‘We Yesũ ookĩte ĩũlũ wa nthĩ e na kĩeleelo o kya kwĩka syama sya kũvosya andũ? Na aaĩle kũendeesya ũthũkũmi wake kĩsionĩ kya Kavelinaumi kĩ kyoka? Aisye ata ĩũlũ wa ũndũ ũsu?’

Yesũ asũngĩie amanyĩw’a make amea atĩĩ: “Tũendei vandũ vangĩ, ndũanĩ ila syĩ vakuvĩ, nĩ kana nĩtavany’e kũu o nakw’o, nũndũ nookie kwondũ wa ũu.” O na ĩngĩ, Yesũ asũngĩie andũ ala mendaa ndakaume kĩsionĩ kĩu amea atĩĩ: “No nginya nĩtavany’e ũvoo mũseo wa Ũsumbĩ wa Ngai ndũanĩ ila ingĩ o nasyo, nũndũ natũmiwe kwondũ wa ũu.”—Maliko 1:38; Luka 4:43.

Vate nzika, ũndũ mũnene ũla watumie Yesũ oka ĩũlũ wa nthĩ nĩ kũtavany’a ĩũlũ wa Ũsumbĩ wa Ngai. Ũsumbĩ ũsu nĩw’o ũkathesya ĩsyĩtwa ĩtheu ya Ĩthe wake na ũivetangĩa andũ mathĩna tene na tene. Kwa kũvosya andũ kwa nzĩa ya kyama, Yesũ nĩwaĩkĩĩthisye kana atũmĩtwe nĩ Ngai. O ta Yesũ, myaka maana maingĩ mĩvĩtu, Mose nĩweekie syama nene nĩ kana aĩkĩĩthye andũ atũmĩtwe nĩ Ngai.—Kuma 4:1-9, 30, 31.

Kwoou Yesũ nĩwaumie Kavelinaumi nĩ kana akatavany’e ũvoo mũseo isionĩ ingĩ. Eekie ũu e o na ala amanyĩw’a make ana. Amanyĩw’a asu make nĩ Vetelo na mwana-a-inyia Endelea, na Yoana na mwana-a-inyia Yakovo. Vavĩtĩte kyumwa kĩmwe kuma Yesũ anyuva amanyĩw’a asu ana maendanasye nake.

Wĩa wa kũtavany’a ũla Yesũ watethisye e na amanyĩw’a make ana kĩsionĩ kya Kalilii nĩweethĩiwe na mosyao maseo! O na maũndũ ala Yesũ weekaa nĩmamanyĩkie isionĩ mbingĩ. ‘Ũvoo ĩũlũ wake nĩwanyaĩĩkie kĩsionĩ kyonthe kya Silia,’ nthĩnĩ wa kĩsio kya ndũa ĩkũmi kyeetawa Ndekavoli, na isionĩ ingĩ ila syaĩ mũingo wa Ũsĩ wa Yolotani. (Mathayo 4:24, 25) Makomano manene ma andũ kuma isionĩ isu na kuma Yutia nĩmamũatĩĩie Yesũ na amanyĩw’a make. Andũ aingĩ nĩmaetie awau moo nĩ kana mavow’e nĩ Yesũ. Yĩla Yesũ waeteiwe andũ asu awau amavosye, nĩwamavoasya na kumya ndaimoni.