Ũkoretwo ũrĩ mũthenya wĩna mĩhang’o mĩingĩ harĩ Jesu na arutwo ake ana gũkũ Kaperinaumu. Gwakinya hwaĩ-inĩ, andũ a Kaperinaumu makamũrehera arwaru nĩguo amahonie. Jesu akoretwo na kahinda kanini mũno ga kũhurũka.

Mũthenya ũyũ ũngĩ rũcinĩ tene kũrĩ o na nduma, Jesu agokĩra na akoima nja arĩ wĩki. Agathiĩ handũ hehithĩte nĩguo aranĩrie na Ithe kũgerera mahoya hatarĩ na andũ angĩ. No ndegũikara arĩ wiki ihinda iraihu. Maaga Jesu, ‘Simoni na arĩa marĩ nao’ makambĩrĩria kũmũcaria. No kũhoteke Petero nĩwe ũmatongoretie tondũ Jesu oima mũgeni wake.​—Mariko 1:36; Luka 4:38.

Mona Jesu Petero akoiga: “Andũ othe nĩwe maracaria.” (Mariko 1:37) Andũ a Kaperinaumu marenda Jesu aikare o kũu. Nĩ makenete mũno nĩ maũndũ marĩa Jesu amekĩire, kwoguo makageria “kũmũgiria ndakoime kũu.” (Luka 4:42) O na kũrĩ ũguo-rĩ, hihi Jesu okire gũkũ thĩ kũringa ciama cia kũhonania tu? Na maũndũ marĩa agĩrĩirũo nĩ gwĩka-rĩ, egwĩkĩra o itũũra rĩrĩ tu? Jesu we ekuga atĩa ũndũ-inĩ ũyũ?

Akeera arutwo ake ũũ: “Nĩ tũthiĩi kũndũ kũngĩ, taũni-inĩ iria irĩ hakuhĩ, nĩguo ngahunjie kũu o nakuo, tondũ nĩkĩo gĩatũmire njũke.” Jesu o na akeera arĩa maramwĩra aikaikare ũũ: “No mũhaka hunjie ũhoro ũrĩa mwega wa Ũthamaki wa Ngai matũũra-inĩ marĩa mangĩ o namo, tondũ nĩkĩo ndaatũmirũo.”​—Mariko 1:38; Luka 4:43.

Gĩtũmi kĩnene kĩa Jesu gũka gũkũ thĩ nĩ kũhunjia ũhoro wĩgiĩ Ũthamaki wa Ngai. Ũthamaki ũcio nĩ ũgaatheria rĩĩtwa rĩa Ithe na ũniine biũ mathĩna mothe ma andũ. Jesu akonania na njĩra ya kũringa ciama cia kũhonania atĩ atũmĩtwo nĩ Ngai. Karine nyingĩ hau kabere, Musa o nake nĩ eekire maũndũ manene, na njĩra ĩyo akĩonania atĩ aatũmĩtwo nĩ Ngai.​—Thama 4:1-9, 30, 31.

Kwoguo Jesu akoima Kaperinaumu nĩguo akahunjie matũũra-inĩ mangĩ, na arutwo ake ana magathiĩ hamwe nake. Acio ana nĩ Petero na mũrũ wa nyina Andrea o hamwe na Johana na mũrũ wa nyina Jakubu. Kiumia kĩmwe kĩhĩtũku, nĩ maakoretwo metwo nĩ Jesu marĩ a mbere matuĩke arutithania wĩra hamwe nake.

Ũtungata wa Jesu thĩinĩ wa Galili hamwe na arutwo acio ana ũkagĩa na moimĩrĩro mega! Ũhoro wĩgiĩ Jesu ũgathiĩ kũndũ kũnene mũno. ‘Ũhoro wake ũkamenyeka Siria guothe,’ nginya gĩcigo kĩa matũũra marĩa ikũmi gĩtagwo Dekapoli, na mũrĩmo ũrĩa ũngĩ wa Rũĩ rwa Jorodani. (Mathayo 4:​24, 25) Andũ aingĩ kuuma matũũra-inĩ macio o hamwe na Judea makarũmĩrĩra Jesu na arutwo ake. Aingĩ makamũrehera andũ marenda kũhonio. Jesu akaga kũmoraga ngoro, akahonia arĩa arwaru na akaingata maroho moru kuuma kũrĩ arĩa marĩ na ndaimono.