Yesu ne baana banji ba bwanga bana bapayankene bingi mu Kapenama. Mu kimye kya mabanga, bangikazhi ba mu Kapenama bamuletejile bantu bakolelwe kuba’mba ebabuke. Kechi wajingapo na kimye kya kwikala bunke ne.

Juba jalondejilepo ku makya, Yesu wabuukile ne kuya pangye kwa bunke. Wayile ku mpunzha kwa bunke na kulomba kwi Bashanji. Bino Yesu kechi waikele bunke kimye kyabaya ne. Byo bayukile’mba Yesu ufwapo, “Shimona ne bo ajinga nabo” batatwile kumukeba, kabiji kyamweka Petelo ye watangijile uno mwingilo wa kukeba Yesu mambo wanji mwenyi mu nzubo yanji.—Mako 1:36; Luka 4:38.

Byo bamutaaine Yesu, Petelo waambile’mba: “Bonse babena kwimukeba.” (Mako 1:37) Bantu ba mu Kapenama bakebeshe bingi amba Yesu ekale nabo. Basekejile bingi pa bintu byo ebobijile, onkao mambo baishile “ko ajinga, ne kumukanya’mba kange aye ne.” (Luka 4:42) Bino, nanchi kubuka bantu mu jishinda ja kukumya ye mwingilo mwine Yesu ye aishijile pano pa ntanda nyi? Kabiji nanchi wafwainwe kwingijilangatu mu nyaunda imo nyi? Nga aye mwine waambilepo’mba ka pa kino?

Yesu wakumbwile baana banji ba bwanga amba: “Twayai tuyenga kukwabo, mu mizhi iji pepi, kuba’mba nako nkasapwileko, mambo kino kyo kyo naishila.” Kabiji Yesu waambijile bantu bakebelenga’mba ekale nabo amba: “Nafwainwa kusapwila mambo awama a Bufumu bwa Lesa ne ku mizhi ikwabo, mambo kino kyo kyo bantumijile.”—Mako 1:38; Luka 4:43.

Ee, mwine mwingilo Yesu ye aishiljie pano pa ntanda ke kusapwila mambo a Bufumu bwa Lesa. Buno Bufumu bukatumbijika jizhina ja Bashanji ne kupwisha makatazho a bantu onse. Bya kukumya byaubilenga Yesu byamwesheshe’mba Lesa ye wamutumine. Mu moba a kala, Mosesa naye waubile bya kukumya pa kuba’mba bantu bayuke’mba bamutumine kwi Lesa.—Kulupuka 4:1-9, 30, 31.

Yesu byo afumine mu Kapenama ne kuya na kusapwila ku mizhi ikwabo, baana banji ba bwanga bana bayile nanji. Bano bana bajinga bankasa ne kolo ba Petelo ne Andeleo ne ba Yoano ne Yakoba. Vulukai’mba papichile mulungu umo kufuma kimye Yesu kyo ebechile kuba’mba bengilenga nanji.

Mwingilo wa kwa Yesu wa kusapwila mu Ngalilea pamo na baana banji ba bwanga bana waendele bingi bulongo. Kabiji Yesu wayile bingi nkuwa. “Wayile nkuwa monse mu Silya” kufika ne mizhi ikatampe jikumi mu kibunji kitelwa’mba Ndekapoli, ne ku bushiya bwa Mukola wa Yodano. (Mateo 4:24, 25) Mabumba akatampe afumine mu ano mapuzha, ne mu Yudea alondejilenga Yesu ne baana banji ba bwanga. Bantu bavula baletele bakolelwenga kwi Yesu kuba’mba ebabuke, kabiji naye kechi wakaine ne. Wibabukile ne kupanga bandemona mu boba bajinga na bandemona.