Jesu ni balutiwa bahae nebapatehile hahulu mwa Kapernauma lizazi kaufela. Manzibwana, batu ba mwa Kapernauma bamutiseza bakuli babona kuli abafolise. Jesu hasika ba ni nako yeñata ya kuba anosi kuli alapele ku Ndatahe.

Cwale habusa, Jesu uzuha inze kusanani kafifi mi uzwela kwande anosi. Uya kwa sibaka sesikuzize kuli ayo lapela ku Ndatahe. Kono Jesu haini nako yetelele anosi. “Simoni ni banaali ni bona” habalemuha kuli hayo, bakala kumubata. Mwendi Pitrosi ubaetelela bakeñisa kuli Jesu naafitezi kwa ndu yahae.—Mareka 1:36; Luka 4:38.

Habafumana Jesu, Pitrosi uli: “Batu kaufela bakubata.” (Mareka 1:37) Kaniti, batu ba mwa Kapernauma babata kuli Jesu aine ni bona. Baitumela kwa lika zaezize, kacwalo balika “kumuhanisa kuli asike abasiya.” (Luka 4:42) Kono kana Jesu naatezi kuto eza feela limakazo za kufolisa fa lifasi? Mi kana uswanela kueza misebezi yahae mwa sibaka seo feela? Jesu ubulelañi ka za taba ye?

Jesu ualaba balutiwa bahae kuli: “Haluyeñi kusili, mwa litolopo zeli bukaufi, kuli niyo kutaza mwateñi ni mona, kakuli wo ki ona mulelo onitezi.” Mi mane Jesu ubulelela batu bababata kuli asike abasiya, uli: “Nilukela kuyo shaela taba yende ya Mubuso wa Mulimu ni kwa mileneñi yemiñwi, kakuli ki sona senilumezwi.”—Mareka 1:38; Luka 4:43.

Kaniti, libaka lelituna latezi Jesu fa lifasi ki kuto kutaza za Mubuso wa Mulimu. Mubuso wo ukakenisa libizo la Ndatahe ni kufelisa matata kaufela a batu. Jesu ufa bupaki bwa kuli ulumilwe ki Mulimu ka kueza limakazo za kufolisa batu. Lilimo-limo kwamulaho, Mushe ni yena naaezize limakazo kuli afe bupaki bwa kuli naalumilwe ki Mulimu.—Exoda 4:1-9, 30, 31.

Kacwalo, Jesu uzwa mwa Kapernauma kuyo kutaza mwa mileneñi yemiñwi, mi balutiwa bahae babane baya ni yena. Balutiwa bao ki Pitrosi ni munyanaa hae Andreasi, ni Joani ni muhulwanaa hae Jakobo. Sunda yefelile, neli bona bapili bane bamemilwe kuzamaya ni Jesu mwa musebezi wahae.

Musebezi wa Jesu ni balutiwa bahae babane wa kukutaza mwa Galilea uzamaile hande luli! Mane litaba za Jesu zautwahala ni kwa libaka za kwahule. “Libubo lahae layamba mwa Siria kaufela,” kuyo fita mwa sibaka sa mileneñi yelishumi sesibizwa Dekapolisi, ni kuyo fita kwabuse bobuñwi bwa Nuka ya Jordani. (Mateu 4:24, 25) Buñata bwa batu ba mwa libaka zeo ni ba mwa Judea balatelela Jesu ni balutiwa bahae. Babañata bamutiseza bababata kufoliswa. Jesu haabahaneli—ufolisa bakuli ni kuleleka mioya yemaswe ku babakenwi ki madimona.