Likumbi apwile Yesu muKapelenau natumbaji twenyi vawana lyapwile lyamilimo chikuma. Kaha kuchingoloshi vatu vamuKapelenau vamunehelelele vaveji mangana avoke. Ngocho Yesu kapwile nalwola lwakupwa ukawenyiko.

Kaha omu kwachele nachimene, shimbu kwapwile muze fucha, Yesu ahindukile nakuya haweluka uka wenyi. Ayile kupenge kwauka wenyi nakulomba kuli Ise. Oloze, nakushimbula chiku, “Shimona navaze apwile navo” vayile nakumutonda. Petulu pamo ikiye apwile nakutwaminyina vakwavo, mwomwo Yesu apwile hembo lyenyi.—Mako 1:36; Luka 4:38.

Omu vamuwanyine Yesu, Petulu ambile ngwenyi: “Vatu vosena vali nakukutonda.” (Mako 1:37) Vaka-Kapelenau vasakile Yesu atwamenga navo lika. Vasakwililile chikupu havyuma avalingilile, ngocho vesekele “kumuzezeka mangana ahone kuvaseza.” (Luka 4:42) Uno Yesu ejile hano hamavu mangana alinge kaha vyuma vyakukomwesa tahi? Kutala atelele kuzachila kaha mungalila kaneyi tahi? Jino yivene ambile ngwenyi ika?

Yesu alwezele tumbaji twenyi ngwenyi: “Tuyenu kweka, kujimbongi jize jili kwakamwihi mangana ngukambulwile nakuze nawa, mwomwo echi chikiko ngwejililile.” Alwezele vatu vaze vasakile atwame ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.”—Mako 1:38; Luka 4:43.

Chapundu vene, chuma chachilemu chize Yesu ejilile hano hamavu shina kwambulula mujimbu waWangana waKalunga. Wangana kana naukajilika lijina lyaIse nakukumisa ukalu wosena vanakumona vatu. Chipwe ngocho, Yesu alingile vyuma vyakukomwesa mangana asolole nge vamutumine chikupu kuli Kalunga. Omu mukiko alingile Mose myaka kafwe makulukaji kunyima. Vyuma vyakukomwesa alingile vyasolwele nge vamutumine kuli Kalunga.—Kulovoka 4:1-9, 30, 31.

Ngocho, Yesu afumine muKapelenau natumbaji twenyi vawana nakuya nakwambulula kujinganda jeka. Ava tumbaji vawana vapwile Petulu, nandumbwenyi Andelei, kaha naYowano nandumbwenyi Yakova. Halwola kana mwahichile kaha chalumingo chimwe kufuma haze Yesu avasanyikile vatambukenga nenyi mumilimo yenyi. Ava vakiko vapwile tumbaji twenyi vatete.

Ungeji waYesu wakwambulila kuNgalileya hamwe natumbaji twenyi vawana wafukilile chiyovo. Kaha puho yenyi yahetele nakumafuchi akwakusuku. Mbimbiliya ngwayo: “Mujimbu wavyuma alingile watanjile nakuSulya kwosena,” nakujinganda likumi jakuNdekapole, nakusali yaKalwiji Yotau. (Mateu 4:24, 25) Mayongomena avatu vakujingalila kana, nakuYuleya vakavangijile Yesu natumbaji twenyi. Vavavulu vamunehelelele vaveji mangana avoke. Yesu avokile vosena nakufumisa vandemone.