Ifuku dadiñayi Yesu muKaperinamu nawatumbanji twindi awana, wazataña nyidimu yayivulu chikupu. Namelela, antu amuKaperinamu anamuleteli ayeji kulonda ayuuki. Yesu wadiña wanyi nampinji yakwililamu yuma yindi.

Dichi, ifuku dinalondelihu nantetemena iku hachidi heyila, Yesu nahinduki nawa nayi kwankawindi. Nawani iluña damwena kunateli kulombelayi kudi Tata yindi. Ilaña hanatwalekihu kushakama nkawindi hadi mpinji yayilehiku. “Shimona ninowu adiñayi nawu” chinamoniwu nawu Yesu wudi nawena wanyi, anatachiki kumukeñakeña. Petulu watela diyi wunakulombola chineli Yesu wadiña kwitala dindi.—Maku 1:36; Luka 4:38.

Chinamuwaniwu Yesu, Petulu namuleji nindi: “Antu ejima anakukukeñakeña.” (Maku 1:37) Antu amuKaperinamu anakukeña nawu Yesu ashakami. Anatiyi kuwaha nayuma yinayililiyi, dichi anakukeña “kumukañesha nawu abuli kuyishiya.” (Luka 4:42) Hela chochu, komana Yesu wenjili hamaseki nakukoña yihayamisha yakuuka? Komana wukukoñaña nyidimu munidi iluña hohu? Indi Yesu wukuhoshahu nindidi?

Yesu nayakuli atumbanji twindi nindi: “Tuyenu kwacheñi, munyikala yidi mukamwihi kulonda nikwena nishimwiniku, muloña dichuma chinenjilili.” Kafwampi, Yesu nayileji niantu anakukeña nawu yashakami nindi: “Natela cheñi kushimwina nsañu yayiwahi yaWanta waNzambi kunyisumba yikwawu, muloña ichi dichantemesheleliwu.”—Maku 1:38; Luka 4:43.

Mwamweni, muloña waweni wenjililiyi Yesu hamaseki hikushimwina haWanta waNzambi. Iwu Wanta wakajilika ijina daTata yindi nikuuka antu ejima. Yesu namwekeshi nindi amutemesheli kudi Nzambi nanochu chinakuukayi antu muchihayamisha. Mosi niyena muyaaka yakunyima, welileña yuma yakuhayamisha hakumwekesha nindi amutemesheli kudi Nzambi.—Kwidika 4:1-9, 30, 31.

Dichi, Yesu nafumi muKaperinamu hamu nawatumbanji twindi awana nawa anayi nakushimwina munyisumba yikwawu. Awa atumbanji hiyaPetulu nimanakwindi Anderi kushilahu niYowanu namanakwindi Yakoba. Haniyi mpinji, mwadiña munahiti dehi mulungu wumu kufuma hayitambikiliyi nindi ekali akakukalakala nindi.

Mudimu waYesu wakushimwina hamu nanawa atumbanji awana wunazatiki chiwahi hama! Yuma yatañishileñayi yashikili kwejima. “Mpuhu yindi yatiyakeni muSiriya mwejima,” mwiluña danyisumba 10 yatenañawu nawu Dekapoli nikwishinadi daKaloña Yodani. (Matewu 4:24, 25) Mazaza awantu amunawa maluña, nianafumi kuYudeya anakumulondela Yesu niatumbanji twindi. Amavulu anamuleteli ayeji kulonda ayuuki. Yesu hanakaani kuyuukaku, nooki akata nikufumisha aspiritu atama mudi antu akweti andemoni.