Nihiku noothene o Kafarnau, Yesu ni amuhuserya awe asese aatepa oweiwa. Ohiyu, achu o Kafarnau annaaruha achu awiiceliwa wi epenusiwe. Yesu haanono elukuluku wi ichuuwe.

Vano, woosiiselo ene nlelo ohaakumve osavo phaama, Yesu onnavinya nave onnaya okhwipi meekheiye. Onnaphwanya nipuro nawiipitheya wi awerye ovekela wa Tiithi awe. Nyenya okhala wawe weiwo ti wa elukuluku vakhaani. Elukuluku amuhuserya anasuwelaaya wi oocakanela, “Simoni ni akhwawe” annamwaavya Yesu. Petro akhweya tori vahoolo woona wi Yesu ori owannyawe.—Marko 1:36; Luka 4:38.

Vaavaa anamphwanyaaya Yesu, Petro onnaloca: “Atxhu othene annawasya!” (Marko 1:37) Mwawooneya, achu o Kafarnau anachuna wi Yesu akhale weiwo. Chiryene awo annathamalela yeeyo opankeiye, mwawiihiiha anneererya ‘omwakelela ehikhwelaka omuhiya wi apwahe.’ (Luka 4:42) Nyenya, apwanne Yesu aarwiile veelaponi yavathi wi apakeke sootikhiniha seiya sa openusa? Nave apwanne onaphwanela opharaka miteko sawe pahiru mukuma yoola? Tiheeni onaloceiye sa yeela?

Yesu onnawaakhula amuhuserya awe: “Hankoni n’ye okinaku. N’ye itxheko ikina sa vakhiviru, wi weiwotho kalaleyewo Mutxhaka, ntakhara wa nthowa na yeyo kirwelaka.” Chiryene, Yesu onnaaleela achu yaawo anachuna wi ahipwahevo: “Kinnaphwanela olaleryatho Mutxhaka Waphama wa omwene wa Muluku ipoma ikina, ntakhara ti yela kirumeliwaka.”—Marko 1:38; Luka 4:43.

Chiryene, nthowa ntokweene nimweerinhe Yesu oorwa veelaponi, ori olaleerya Omwene wa Muluku. Omwene yoowo onahaala weeliha nsina na Tiithi awe nave onammaliha ireca soothene sa achu. Yesu oovaha sawooniherya wi orumihiwe ni Muluku moorweela wa opaka sootikhiniha sa openusa. Moolikana, iyaakha masana muculi, Mose aahipaka miteko sootikhiniha seiyo soonihenrye wi aarumihiwe ti Muluku.—Mukwaha 4:1-9, 30, 31.

Mwawiihiiha Yesu onnakhuma o Kafarnau wi alaleerye ipooma ikina, nave amuhuserya ooseese annakhala ni yoowo. Ooseese ala ti Petro ni munnawe Antreya, Yohani ni munnawe Yakopo. Esumana evinre awo yaahiwopiwa wi ekhale asinthamwene oopacerya a mukwaha wa Yesu.

Muteko woolaleerya wa Yesu o Kalileya vamoha ni amuhuserya yaala asese onnakumiherya mphurelo waphaama! Mweeparipari, masu vooloca sa Yesu annaphiya mapuro oorakamela. “Ovuwa wawe wàhimwalamwala o Siriya wothewene,” ni ekulucu ya ipooma khumi yiichaniwa Tekapoli, ni mapuro makina a Muhice Yortano. (Mateu 4:24, 25) Miloko sa achu saarweela mapuro yaawo, hiiha ntoko o Yuteya, yaanamuchara Yesu ni amuhuserya awe. Ancipale annaaruuha yaawo anaavya openusiwa. Yesu hanaakhooca—onnaapenusa nave onnakumiha minepa soonanara wa yaale aphariwe ti satana.