Yezu na anyakupfundzace anai amala ntsiku yamumphu ku Kafarnau mbakacita basa. Namaulo, anthu a ku Kafarnau abweresa atenda toera awangiswe. Na thangwi ineyi, Yezu nee akhali na ndzidzi uzinji toera kupuma na kucita pinango ekhene.

Mangwana mwace namacibese kakamwe, Yezu alamuka mbasaka mbuto yace ekhene. Buluka penepo, iye aigumana mbacita phembero kuna Babace. Mbwenye Yezu akhala ekhene mu ndzidzi wakucepa kakamwe. Pidadzindikira anthu kuti Yezu nee akhali na iwo, ‘Simau na andzace’ aenda kansaka. Panango Pedhru akhali wakutoma kusaka Yezu thangwi akhali panyumba pace.—Marko 1:36; Luka 4:38.

Pidagumana iwo Yezu, Pedhru alonga: ‘Anthu onsene asakusakani.’ (Marko 1:37) Mwandimomwene, anthu a ku Kafarnau akhafuna kakamwe kukhala na Yezu. Iwo akhakomerwa kakamwe na pinthu pikhacita Yezu, natenepa ayesera ‘kumpingiza toera iye akhonde kuasiya.’ (Luka 4:42) Kodi Yezu abwera pa dziko yapantsi basi ene toera kucita pirengo ninga kuwangisa anthu? Kodi iye akhafunika kucita basa yace basi ene mu cisa ceneci? Iye alonganji thangwi ya pyenepi?

Yezu atawira anyakupfundzace: ‘Tendeni ku mbuto inango, m’mizinda ya cifupi toera ndimwazembo mphangwa kweneko, thangwi ine ndadzera pyenepi.’ Yezu apangambo anthu ale akhafuna kuti iye akhonde kubuluka: ‘Ndisafunikambo kumwaza mphangwa zadidi za Umambo wa Mulungu m’mizinda inango, thangwi ine ndatumwa toera kucita pyenepi.’—Marko 1:38; Luka 4:43.

Thangwi ikulu idacitisa Yezu kubwera pa dziko yapantsi ndi toera kumwaza mphangwa za Umambo wa Mulungu. Umambo unoyu unadzacenesa dzina ya Babace na kumalisa nyatwa zonsene zinatamba anthu. Kuwangisa atenda mwacirengo, kukhapangiza kuti Yezu atumwa na Mulungu. Munjira ibodzi ene, pyaka madzana pyenepi mbapidzati kucitika, Mose acitambo pirengo toera kupangiza kuti akhadatumwa na Mulungu.—Eksodo 4:1-9, 30, 31.

Natenepa, Yezu na anyakupfundzace anai abuluka mu Kafarnau toera kamwaza mphangwa m’mizinda inango. Anyakupfundza anewa akhali Pedhru na m’bale wace Andreya, Juwau na m’bale wace Tiyago. Sumana ibodzi nduli, iwo akhadaphembwa na Yezu toera kucita naye ulendo.

Ulendo unoyu udacita Yezu na anyakupfundzace anai toera kamwaza mphangwa ku Galileya ukhali wakutsandzayisa kakamwe! Mwandimomwene, mphangwa thangwi ya Yezu zamwazika mu cisa consene. ‘Mbiri yace yamwazika mu dziko yonsene ya Siriya,’ ngakhale ku pisa pya mizinda khumi inacemerwa Dhekapoli, mpaka ku pisa pinango pya Nkulo wa Yordani. (Mateu 4:24, 25) Mwinji ukulu wa pisa pyenepi na pya Yudeya watowera Yezu na anyakupfundzace. Azinji abweresa anthu akuti akhafuna kuwangiswa mautenda awo. Yezu nee aatsukwalisa, mbwenye awangisa anthu akhaduwala, mbathamangisa mizimu yakuipa kwa ale akhathabuswa na madimonyo.