Yesus du furu a dei di a ben de na ini Kaperna-um nanga den disipel fu en. Na neti sma fu Kaperna-um e tyari den siki sma fu meki a dresi den. Yesus no kisi nowan okasi fu de en wawan.

Frukufruku a tra mamanten te a dungru ete, Yesus e opo go na dorosei na wan presi pe a kan de en wawan. A feni wan presi pe a kan taki nanga en Papa na ini begi. Ma a no e tan en wawan tumusi langa. Te Simon Petrus nanga den trawan kon si taki Yesus no de, dan ’en nanga den tra sma di de nanga en e go suku Yesus’ na ala sei. Kande Petrus e teki fesi fu di Yesus ben e tan na en oso.​—Markus 1:36; Lukas 4:38.

Te den feni Yesus, Petrus e taki: „Ala sma e suku yu” (Markus 1:37). Wi kan frustan taki den sma fu Kaperna-um wani taki Yesus musu tan nanga den. Den breiti nanga den sani di a du gi den èn dati meki den e pruberi fu „hori en fu a no gowe fu den” (Lukas 4:42). Ma a de so taki Yesus kon na grontapu spesrutu fu dresi sma na wan wondru fasi? A de so taki na ini Kaperna-um wawan a ben o du a diniwroko fu en? San Yesus srefi e taki fu a tori disi?

Yesus e taigi den disipel fu en: „Kon meki wi go na wan tra presi na den pikin foto di de na ini a birti, so taki mi kan preiki drape tu, bika na fu dati ede mi kon.” Srefi den sma di wani en fu tan, a e taigi: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon.”​—Markus 1:38; Lukas 4:43.

Iya, wan fu den moro prenspari sani di Yesus kon du na grontapu, na fu preiki fu Gado Kownukondre. A Kownukondre dati o meki a nen fu en Papa kon santa èn a o lusu den problema fu libisma fu ala ten. Den wondru di Yesus e du fu dresi sma e sori taki na Gado seni en kon. Hondrohondro yari fosi Yesus, Moses ben du wondru tu fu sori taki na Gado ben seni en.​—Eksodes 4:1-9, 30, 31.

Now Yesus e gowe libi Kaperna-um fu go preiki na den tra foto èn den fo disipel e go nanga en. Den fo disipel na Petrus nanga en brada Andreas, èn Yohanes nanga en brada Yakobus. Wan wiki pasa Yesus ben kari den fu go preiki nanga en na difrenti presi.

A preikiwroko di Yesus nanga den fo disipel disi du na Galilea abi furu bun bakapisi! Fu taki en leti, a nyunsu fu den sani di Yesus du panya go na ala sei. ’Sma taki fu en na ini heri Siria’, sosrefi na ini a kontren fu den tin foto di sma e kari Dekapolis èn na abrasei fu Yordan-liba (Mateyus 4:24, 25). Ipi-ipi sma fu den presi dati èn fu Yudea e waka baka Yesus nanga den disipel fu en. Furu sma e tyari den sikiwan fu di den wani taki a dresi den. Èn na dati Yesus e du tu. A e dresi den siki sma èn a e puru ogri yeye na sma tapu.