Yeso la ambeki ande anɛi waki l’olimu efula lushi lakiwɔ la Kapɛrnauma. La dikɔlɔ, ase Kapɛrnauma wakaye le nde la anto awɔ waki la hemɔ dia nde ndjaakɔnɔla. Yeso komonga l’etena k’otale ka nde ntshikala ndamɛ.

La wedi a pindju, la yosose wonya atahotɔ dimɛna, Yeso akatombe ko akatshu dihole dimɔtshi ndamɛ. Nde akatotana dihole diakandakoke monga ndamɛ dia nde nɔmba She lo shɔpɔ. Koko paka lo tshenyi ya tshitshɛ tsho mbakatshikala Yeso ndamɛ. Lam’akawɛnyi dia nde aya bu, “Simɔna l’anto waki la nde” wakatshu toyanga Yeso. Ondo Petero mbakete la ntondo nɛ dia lo luudu lande mbaki Yeso.​—Makɔ 1:36; Luka 4:38.

Etena kakawɛnyi Yeso, Petero akate ate: “Anto tshɛ wekɔ lo koyanga.” (Makɔ 1:37) Aha la taamu, ase Kapɛrnauma wakalange dia Yeso ntshikala lo ngelo kawɔ. Vɔ mɛtɛ wakangɛngɛna kɛnɛ kakandasale, ko vɔ “wakalangaka mboshimba diaha nde mimɔ oma lalewɔ.” (Luka 4:42) Ko, onde Yeso akaye la nkɛtɛ ntondotondo dia ndjɔkɔnɔla anto lo yoho ya dihindo shɔ? Ndo onde nde akahombe nkomɛ l’elimu ande paka lo ngelo kɛsɔ? Kakɔna kakandate lo dikambo sɔ?

Yeso akakadimola ambeki ande ate: “Totshu l’ahole akina, l’esomba wele suke dia dimi tosambisha ndo lɛkɔ, nɛ dia l’oyango ɔsɔ mbakamaye.” Lo mɛtɛ, Yeso akatɛ anto wakalangaka dia nde ntshikala ate: “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.”​—Makɔ 1:38; Luka 4:43.

Eelo, ɔkɔkɔ woleki wakaye Yeso la nkɛtɛ ele dia ndjosambisha awui wendana la Diolelo dia Nzambi. Diolelo sɔ diayokidia lokombo la She ndo diayokandola lo pondjo ekakatanu tshɛ wele l’anto. Yeso akasha djembetelo shikaa yɛnya dia nde akatomama oma le Nzambi lo nkɔnɔla anto lo dihindo. Lo yoho yakɔ yaamɛ, ɛnɔnyi nkama la ntondo, Mɔsɛ akasale awui wa diambo dia nshikikɛ mɛtɛ dia nde akatomama oma le Nzambi.​—Etombelo 4:1-9, 30, 31.

Ko Yeso akamɔ oma la Kapɛrnauma dia tosambisha l’esomba ekina ndo ambeki ande anɛi wakatshu kaamɛ la nde. Ambeki asɔ anɛi ko, Petero nde la Andɛlɛ w’ɔnango kaamɛ ndo Joani la Jakɔba y’ɔnango. Lomingu la la ntondo ka laasɔ, vɔ wakelamɛ dia monga anto wa ntondo wakatɛngɔlaka ndo wakatakambaka la Yeso.

Esambishelo ka la Ngalileya ka Yeso nde la ambeki anɛi asɔ kaki l’etombelo w’amɛna efula! Lo mɛtɛ, nkumu yendana la Yeso yakakome l’ahole wa tale. “Lokumu lande lakadiangana lo Suriya k’otondo,” l’ɛtshi ka nkɛtɛ k’esomba dikumi k’elamɛ Dekapɔli, ndo polo ndekana wedi okina w’Ɔkɛdi wa Jɔrdana. (Mateo 4:24, 25) Elui a weke w’anto w’oma l’ahole asɔ kaamɛ ndo oma la Judeya wakayele Yeso nde la ambeki ande. Efula kawɔ wakawela wanɛ wakayangaka ɛkɔnwɛlɔ. Yeso kombasha nsɔnyi, nde akakɔnɔla wanɛ waki la hemɔ ndo akatondja ɛdiɛngɛ oma le wanɛ waki la wɔ.