Yesu ndi akusambira ŵaki angutangwanika ukongwa ku Kaperenao. Ndi mazulu, ŵanthu akwenuku anguza ndi ŵanthu wo atamanga kuti Yesu waŵachizgi. Mwaviyo, Yesu wengavi nyengu yakuti wachiti vinthu vinyaki pakuyija.

Mawa laki, Yesu wanguyuka ndi mlenjilenji ndipu wanguluta kwaku yija kuti wakapempheri kwa Awisi. Kweni ŵanthu anguswera cha kuziŵa kuti Yesu palivi. Mwaviyo, “Simoni ndi ŵanthu wo wenga nawu” angwamba kumupenja. Viwoneka kuti Peturo ndiyu walongozganga anyaki chifukwa pa nyengu iyi, Yesu wenga mlendu waki.—Mariko 1:36; Luka 4:38.

Ŵati amusaniya, Peturo wangukambiya Yesu kuti: “Ŵanthu wosi atikupenjani.” (Mariko 1:37) Ŵanthu a ku Kaperenao anguyesesa kuti Yesu wangalutanga cha. Yiwu akondwanga ukongwa ndi vo Yesu wachitanga. Mwaviyo, “akhumbanga cha kuti wakengi.” (Luka 4:42) Chinanga kuti venga viyo, kumbi chifukwa chikulu cho Yesu wanguziya pacharu chapasi chenga kuzichita vakuziziswa? Kumbi iyu wakhumbikanga kugwira ntchitu yakupharazga muchigaŵa chenichi pe? Kumbi Yesu wangumuka wuli mafumbu ngenanga?

Yesu wangumuka akusambira ŵaki kuti: “Tiyeni tiluti kunyaki, mumatawuni ngapafupi kuti nkhapharazgi so kweniko, chifukwa chenichi ndichu ndikuziya.” Yesu wangukambiya so ŵanthu wo akhumbanga cha kuti watuweku kuti: “Nditenere so kuchipharazga uthenga wamampha wa Ufumu waku Chiuta ku matawuni nganyaki, chifukwa chenichi ndichu ndikuziya.”—Mariko 1:38; Luka 4:43.

Chifukwa chikulu cho Yesu wanguziya pacharu chapasi, chenga kuzipharazga vakukwaskana ndi Ufumu waku Chiuta. Ufumu wenuwu wazamutowesa zina la Awisi ndipuso wazamumalisa masuzgu ngosi nga ŵanthu. Vo Yesu wanguchita pakuchizga ŵanthu mwakuziziswa vingulongo kuti wangutumika nadi ndi Chiuta. Mwakuyanana ŵaka, vyaka vinandi kuvuli, Mozesi wanguchita vakuziziswa vinandi vo vingulongo kuti wangutumika ndi Chiuta.—Chituwa 4:1-9, 30, 31.

Pavuli paki, Yesu ndi akusambira ŵaki anayi angutuwaku ku Kaperenao ndipu anguluta kuchipharazga ku matawuni nganyaki. Akusambira ŵenaŵa ŵenga Peturo ndi mvurwa waki Andireya kweniso Yohane ndi mvurwa waki Yakobe. Pa nyengu iyi, ndipu pajumpha sabata yimoza kutuliya po Yesu wanguŵadaniya kuti ayendengi nayu.

Ntchitu yakupharazga yo Yesu ndi akusambira ŵaki anayi agwiranga ku Galileya, yingwenda umampha ukongwa. Ŵanthu a muvigaŵa vakutali anguvwa vo Yesu wachitanga. “Mbiri yaki yinguwanda mu Siriya mosi” kweniso muchigaŵa cha Dekapoli, cho chaziŵikanga so kuti chigaŵa cha matawuni 10. Nkhani yeniyi yingufikaso ku sirya linyaki la Msinji wa Yorodani. (Mateyu 4:24, 25) Ŵanthu anandi akutuliya muvigaŵa venivi kweniso ku Yudeya, angwamba kulondo Yesu ndi akusambira ŵaki. Anandi anguza ndi ŵanthu wo atamanga ndipu Yesu wanguŵachizga kweniso anyaki wanguŵatuzga mizimu yiheni. Mwaviyo, ŵanthu ŵenaŵa angukondwa ukongwa.