Ne fakalavelave malosi a Iesu mo ana soko e tokofa i te aso tenā i Kapanaumi. I te afiafi po, ne avatu ne tino Kapanaumi olotou tino ma‵saki ke faka‵lei aka. Kae ne seki maua ne Iesu se taimi ke nofo atu i a ia eiloa.

Nei la, i te tafataeao o te suā aso, kae koi pouli eiloa, ne tu aka a Iesu ki luga kae ne fanatu tokotasi ki tua. Ne maua ne ia se koga telā e seai ne tino i ei kae ne mafai o ‵talo tokotasi atu a ia ki tena Tamana. Ne seki leva te taimi ne nofo tokotasi ei a Iesu. I te taimi ne iloa ei ne latou me i a ia e galo, ne olo atu ei a “Simona mo nisi tino kolā ne ‵nofo mo ia” o ‵sala ki a Iesu. Kāti ne mua atu a Petelu me ne nofo atu a Iesu i tena fale.—Maleko 1:36; Luka 4:38.

I te taimi ne maua ei ne latou a Iesu, kae ne fai atu a Petelu: “A tino katoa e ‵sala ki a koe.” (Maleko 1:37) E malamalama ‵lei tatou, me ne ma‵nako a tino Kapanaumi ke nofo atu a Iesu. Ne fakatāua tonu eiloa ne latou a mea kolā ne fai ne ia, telā ne taumafai latou “o taofi a ia ke mo a e fano keatea mai i a latou.” (Luka 4:42) Kae e mata, ne vau fua a Iesu ki te lalolagi ke fai ne ia a faka‵leiga fakavavega penā? Kae e mata, e ‵tau o gata atu fua ana galuega i te fa‵kai tenei? Ne a ana pati e uiga ki te mea tenei?

Ne tali atu a Iesu ki ana soko: “Tatou ka olo ki se isi koga, ki fa‵kai kolā e ‵pili mai, ko te mea ke talai foki au i ei, me e tenā te pogai ne uga mai ei au.” A te ‵tonuga loa, ne fai atu foki a Iesu ki tino kolā ne ma‵nako ke nofo a ia: “E ‵tau foki mo au o folafola atu te tala ‵lei o te Malo o te Atua ki nisi fa‵kai, me tenei eiloa te mea ne uga mai ei au.”—Maleko 1:38; Luka 4:43.

E tonu, a te ‵toe pogai tāua ne vau ei a Iesu ki te lalolagi ke talai atu e uiga ki te Malo o te Atua. Ka faka‵malu ne te Malo tenā a te igoa o tena Tamana, kae ka faka‵lei katoatoa ne ia a fakalavelave katoa o tino. Ne fai ne Iesu a faka‵leiga fakavavega ke fakamaoni aka ei me i a ia ne uga mai ne te Atua. I se auala tai ‵pau, e pelā eiloa mo Mose i te fia o senitenali mai mua atu i ei, ne fai foki ne ia a vavega ke fakamaoni aka ei, me i a ia ko te tino telā ne uga mai ne te Atua.—Esoto 4:1-9, 30, 31.

Tela la, ne tiakina ne Iesu a Kapanaumi ke talai atu i nisi fa‵kai, kae ne olo fakatasi atu a ia mo ana soko e tokofa. A latou konā e tokofa, ko Petelu mo tena taina ko Anitelea, penā foki loa mo Ioane mo tena taina ko Iakopo. I te vaiaso mai mua atu i ei, ne fatoa ‵kami latou ke fai pelā me ne tino faima‵laga fakatasi mo Iesu.

Ne magoi malosi te malaga talai a Iesu mo ana soko konei e tokofa! A te ‵tonuga loa, ne salalau atu eiloa a tala e uiga ki a Iesu ki koga ‵mao. “Ne oko atu te lipoti e uiga ki a ia i Sulia kātoa,” ki te kogā koga o fa‵kai e sefulu e igoa ki a Tekapoli, mo te suā feitu o te Vaitafe o Iolitana. (Mataio 4:24, 25) Ne tau‵tali atu eiloa i a Iesu mo ana soko se vaitino tokouke mai i koga konā, e pelā foki mai i Iuta. Ne avatu ne tino e tokouke a tino ma‵saki. Ne seki fai ne Iesu ke fanoa‵noa latou—ne faka‵lei ne ia a tino ma‵saki kae ‵tuli keatea a agaga ma‵sei mai i tino kolā ne ulufia ne temoni.