Mea rahi ta Iesu ohipa i rave i Kaperenaumi, apeehia e ta ˈna e maha pǐpǐ. I te ahiahi, afai maira to Kaperenaumi i to ratou feia maˈi ia ˈna ra ia ora to ratou maˈi. Aita rea e taime to Iesu no te pure i to ˈna Metua o ˈna anaˈe.

E aahiata aˈera, te poiri noa ra. Tia aˈera Iesu e haere atura i rapae. Ite atura oia i te hoê vahi moˈemoˈe no te pure i to ˈna Metua o ˈna anaˈe. Aita râ i maoro, ite aˈera “Simona ma” e aita oia, e paimi maira ia ˈna. O Simona paha, pii-atoa-hia Petero, na mua tei paimi ia ˈna no te mea no ǒ Iesu i ǒ ˈna ra.—Mareko 1:36; Luka 4:38.

Ia ratou i ite mai ia Iesu, parau maira Petero: “Te imi nei te taata atoa ia oe.” (Mareko 1:37) Ua hinaaro iho â to Kaperenaumi ia faaea mai Iesu. Ua au roa hoi ratou i ta ˈna i rave, taparuparu aˈera ïa ratou ia ˈna “ia faaea mai.” (Luka 4:42) Tera râ, ua haere mai anei Iesu i te fenua na mua roa no te faaora semeio i te maˈi? I tera noa anei oire e rave ai oia i ta ˈna ohipa? Eaha ta ˈna i parau?

Pahono atura Iesu i ta ˈna mau pǐpǐ: “Mai haere anaˈe i te tahi atu vahi, i roto i te mau oire tapiri, ia poro atoa vau i ǒ, no reira hoi au i haere mai ai.” Ua parau atoa Iesu i te feia e hinaaro ra ia faaea mai oia: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi, no reira hoi au i tonohia mai ai.”—Mareko 1:38; Luka 4:43.

Oia mau, te hoê tumu faufaa i haere mai ai Iesu i te fenua, no te poro ïa i te Faatereraa arii a te Atua. Na roto i teie Faatereraa arii e moˈa ˈi te iˈoa o to ˈna Metua e e afaro ai te mau fifi atoa o te taata e a muri noa ˈtu. A faaora semeio ai oia i te maˈi, ua haapapu Iesu e na te Atua i tono mai ia ˈna. Na reira atoa i tahito ra, ua rave Mose i te mau ohipa mana no te haapapu e na te Atua i tono ia ˈna.—Exodo 4:1-9, 30, 31.

Faarue atura Iesu i Kaperenaumi no te poro i te tahi atu mau oire. Apee atoa maira ta ˈna e maha pǐpǐ ia ˈna, o Petero raua to ˈna taeae Anederea, e o Ioane raua to ˈna taeae Iakobo. Te hebedoma na mua ˈtu, ua titauhia ratou ia riro ei hoa ohipa matamua no Iesu o te ratere e o ˈna.

Ua manuïa mau to Iesu tere pororaa e ta ˈna e maha pǐpǐ ati aˈe Galilea! Ua atutu hoi te parau o Iesu na tera e tera vahi. “Faaroo aˈera to Suria atoa i ta ˈna i rave,” i te tuhaa fenua no na oire hoê ahuru piihia Dekapoli e na tera ˈtu pae o te anavai Ioridana. (Mataio 4:24, 25) E nahoa rahi no tera mau pae fenua, oia atoa no Iudea, tei pee ia Iesu e ta ˈna mau pǐpǐ. Arataihia maira ia Iesu ra e rave rahi taata ia ora to ratou maˈi. Aita ratou i tatarahapa, ua faaora hoi Iesu i to ratou mau maˈi e ua tiavaru i te mau varua ino o te feia tei uruhia e te demoni.