Han nakadto hi Jesus ha Capernaum upod an iya upat nga disipulo, nagin okupado gud hira hito nga adlaw. Pagkagab-i, an mga tawo ha Capernaum nagdara han ira mga may sakit ngadto kan Jesus basi matambal. Gutiay na la an iya panahon para ha iya kalugaringon.

Kinabuwasan han aga samtang masirom pa, binuhat hi Jesus ngan ginawas nga nag-uusahan. Kinadto hiya ha mamingaw nga lugar basi mag-ampo ha iya Amay. Pero waray la pag-iha, han masantop ni “Simon ngan han iya mga kaupod” nga waray hiya, ginbiling nira hiya. Bangin hi Pedro an nanguna ha pagpamiling kay bisita niya hi Jesus.—Marcos 1:36; Lucas 4:38.

Han nabilngan nira hi Jesus, hi Pedro nagsiring: “Ginbibiniling ka han ngatanan nga tawo.” (Marcos 1:37) Syempre, karuyag han mga taga-Capernaum nga magpabilin hi Jesus didto. Naapresyar gud nira an iya ginbuhat, salit naghangyo hira “nga diri hiya bumaya.” (Lucas 4:42) Kondi, an nangunguna ba nga katuyoan ni Jesus ha pagkanhi ha tuna amo an panambal ha milagroso nga paagi? Ngan an iya ba buruhaton limitado la para hini nga lugar? Ano an iya ginsiring mahitungod hini?

Hi Jesus binaton ha iya mga disipulo: “Kadto kita ha iba nga lugar, ha kahigrani nga bungto basi magsangyaw liwat ako didto, kay tungod hini kinanhi ako.” Ngani, ginsidngan niya an mga tawo nga naruruyag nga magpabilin hiya: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.”—Marcos 1:38; Lucas 4:43.

Oo, an nangunguna nga hinungdan kon kay ano nga kinanhi hi Jesus ha tuna amo an pagsangyaw mahitungod han Ginhadian han Dios. Ito nga Ginhadian magbabaraan han ngaran han iya Amay ngan permanente nga magwawara han ngatanan nga kasakitan han tawo. Basi pamatud-an nga hi Jesus an iginsugo han Dios, nanambal hiya ha milagroso nga paagi. Hadto naghimo liwat hi Moises hin mga milagro basi pamatud-an nga ginsugo hiya han Dios.—Eksodo 4:1-9, 30, 31.

Salit binaya hi Jesus ha Capernaum basi magsangyaw ha iba nga syudad, ngan inupod ha iya an upat nga disipulo—an magbugto nga hira Pedro ngan Andres, pati an magbugto nga hira Juan ngan Santiago. Han naglabay la nga semana, gin-imbitar hira ni Jesus basi magin siyahan niya nga mga kaupod hini nga buruhaton.

Malampuson gud an pagsangyaw ni Jesus ha bug-os nga Galilea kaupod han iya upat nga disipulo! Ha pagkamatuod, hinbaroan tubtob ha kahigrayoan an mahitungod ha iya. “Nahibantog hiya ha bug-os nga Sirya,” ha rehiyon han napulo nga syudad nga gintatawag nga Decapolis, ngan tubtob ha tabok han Salog Jordan. (Mateo 4:24, 25) Damu nga tawo hito nga mga lugar, sugad man ha Judea, an nagsinunod kan Jesus ngan ha iya mga disipulo. Gindara ha iya han damu nga tawo an mga may sakit. Ngan waray hira mapakyas kay gintambal ni Jesus an mga may sakit ngan ginpaiwas an magraot nga espiritu tikang ha mga ginsaniban.