Le tiaʼan Jesús yéetel u kantúul disipuloʼob tu kaajil Capernaumoʼ jach yaʼab meyaj tu beetoʼobiʼ. Le táan u yáakʼabtaloʼ le máakoʼoboʼ tu bisoʼob u kʼoojaʼanoʼob utiaʼal ka tsʼaʼakakoʼob. Le oʼolal maʼ béeyak u jeʼelel Jesús mix jun chan súutukiʼ.

Tuláakʼ kʼiin le táan u taal u sáastaloʼ, Jesuseʼ bin u kaxt junpʼéel kúuchil utiaʼal u orar tiʼ u Taata chéen tu juunal. Baʼaleʼ maʼ xáanchaj chéen tu juunaliʼ. Tumen le ka tu yilaj «Simón yéetel le u maasil máakoʼob yanoʼob tu yéetel» minaʼan tu yiknaloʼoboʼ ka bin u kaxtoʼob. Maʼ xaaneʼ Pedro yáax jóokʼ kaxtik, tumen tu yotoch pʼaatal (Marcos 1:36; Lucas 4:38).

Le ka kʼuchoʼob yiknal Jesuseʼ, Pedroeʼ tu yaʼalajtiʼ: «Tuláakal máak táan u kaxtikech» (Marcos 1:37). U kajnáaliloʼob Capernaumeʼ u kʼáatoʼob ka pʼáatak Jesús yiknaloʼob. Le oʼolal «káaj u yilkoʼob baʼax jeʼel u beetkoʼob utiaʼal maʼ u lukʼul tu yiknaloʼobeʼ» (Lucas 4:42). Baʼaleʼ ¿chéen wa taal Jesús u beet milagroʼob way Luʼumeʼ? ¿Chéen wa tu kaajil Capernaum ken u beet le meyajoʼobaʼ? ¿Baʼax tu yaʼalaj letiʼ yoʼolal lelaʼ?

Letiʼeʼ tu yaʼalaj tiʼ u disipuloʼob: «Koʼoneʼex yaanal tuʼux, teʼ mejen kaajoʼob yanoʼob naatsʼoʼ, utiaʼal ka kʼaʼaytajnakeniʼ, tumen le oʼolal jokʼaʼanen». Ka tu yaʼalaj tiʼ le máakoʼob u kʼáatoʼob ka pʼáatak tu yiknaloʼoboʼ: «Kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼob, tumen le beetik túuxtaʼaben» (Marcos 1:38; Lucas 4:43).

Jeʼex túun k-ilkoʼ, Jesuseʼ taal way Luʼum utiaʼal u kʼaʼaytik u Reino Dioseʼ. Le Reinooʼ letiʼ kun kiliʼichkúuntik u kʼaabaʼ u Taata Jesús yéetel yaan u yutskíintik tuláakal le baʼaxoʼob ku muʼyajtik wíinikoʼ. Le milagroʼob tu beetaj Jesusoʼ tu yeʼesoʼob Dios túuxte. Jeʼex úuchik u beetik milagroʼob Moisés utiaʼal u yeʼesik Dios túuxtmileʼ (Éxodo 4:1-9, 30, 31).

Ka lukʼ Jesús Capernaumeʼ bin tuláakʼ kaajoʼob kʼaʼaytaj yéetel Pedro yéetel Andrés, u yíitsʼin, Juan yéetel Santiago, u yíitsʼin. Letiʼobeʼ junpʼéel semana invitartaʼakoʼob tumen Jesús utiaʼal u múul kʼaʼaytajoʼob.

Le kʼaʼaytaj tu beetaj Jesús yéetel u kantúul disipuloʼob tu luʼumil Galileaoʼ yaʼab máaxoʼob uʼuye. Le oʼolal «le baʼaxoʼob tu beetoʼ kʼuch ojéeltbil tiʼ tuláakal u luʼumil Siria», tiʼ le diez kaajoʼob kʼaj óoltaʼanoʼob bey Decápolisoʼ bey xan tiʼ uláakʼ u tséel le Jordanoʼ (Mateo 4:24, 25). Yaʼabkach máakoʼob tiʼ le luʼumiloʼobaʼ bey xan tiʼ u luʼumil Judeaeʼ joʼopʼ u tsaypachtik Jesús yéetel u disipuloʼob. Yaʼabeʼ tu bisoʼob u kʼoojaʼanoʼob utiaʼal ka tsʼaʼakakoʼob. Jesús túuneʼ tu tsʼakoʼob yéetel tu jóoʼsaj le demonioʼob chukmil jujuntúul tiʼ letiʼoboʼ.