Kiki Yésu ni banigil bé ba-na ba nke téé likalô mu ‘mandap ma bibégés ma Galiléa,’ nwin inyu mam malam Yésu a yé boñ u ntjama homa nyensôna. (Markô 1:39) Bipôdôl gwé ni maboñok mé ma mpam i tison yada het mut lô a yé. Dokta Lukas a mpôdôl nye kiki “Mut wada a bééna lô ni nyuu yosôna.” (Lukas 5:12) Ha likala li, lô i yé i nkoñ ngim bijô bi nyuu.

Jon i mut lô nunu a yé tégbaha mangéda mabe kiyaga, a nlama ndik niñ haa ni bôt bape. Jam lipe li yé le, ngéda bôt ba nlo nye ipañ, inyu boñ le a lôôs bañ bo béba yé kon, a nlama kal le “nyega, nyega!” (Lôk Lévi 13:45, 46) Ndi kii mut lô nunu a mboñ nano? A nkôôge Yésu ipañ, a kwo isi makôô mé, a soohege le: “A Nwet, ibale u ngwés, u nla mélés kon wem.”​—Matéô 8:2.

Kinje hémle i mut nunu a gwé! Ibabé pééna, kon wé u nkônha nye hison ngandak. Kii Yésu a mboñ? Kii we u bé le u boñ ibale u bé ha? Nyonok ni konangoo, Yésu a nsambal woo wé, a ntihba mut nu. Yésu a nkal nye le: “Me ngwés! Kon woñ u mal.” (Matéô 8:3) Hala a ta bé bun i hémle le mut lô a mbôôp kunda yada.

Baa u yé le u gwés bana kiñe i i nkon bôt bape ngoo, i ban-ga ki ngap kiki Yésu? Loñgeñem a bi unda mut lô i nkwés bés nkaa le ngéda Yésu a mba Kiñe nkoñ isi wonsôna, mbañ Bibel ini y’a yon: “A’ kon diyeyeba ni ba ba nsamp ngoo, a’ tohol ki nom i ba ba nsamp.” (Tjémbi 72:13) Yésu a ga hôla ba bobasôna ba gwé ndutu, inyule ngôñ yé i.

Bigda le ilole a mbuubaha mut lô, nson Yésu u bi lona liyôgbe likeñi. Nano, bôt ba ga nok ini hélha jam a mboñ. Ndi Yésu a gwé bé ngôñ le bôt ba hémle nye ndik inyule ba nok mam ma mbéñge nye. A nyi mbañ i bé kal le a bé lama bé ‘bédés kiñ, to boñ le kiñ yé i nôga i mbédgé’ ndik inyu ti nyemede lipém. (Yésaya 42:1, 2) Jon Yésu a nti mut a mélés lô oda le: “Yoñ yihe le u kal bañ mut nye ki nye, ndi ke undba yak prisi, u ti ki likébla Môsi a bi téé kayéle ba ba we mbôgi.”​—Matéô 8:4.

Ndi, kiki u yé le u hégda, i mut nu a yé maséé ngandak kayéle a nla bé tééda jam li inyu yé nyetama. A nke tjam nwin unu mbok yosôna. Hala a nkéñbaha ngôñ i bôt i tehe Yésu, kayéle a nla ha bé jôp i tison yo ki yo. Jon inyu ngim ngéda, Yésu a nyén bahoma het bôt ba mbéna bé yéñ nye. To hala, bôt ba nlo bahoma bahoma inyu boñ le Yésu a niiga bo, a mélés ki makon map.