Iesu petre kö me itre sinatronge i nyidrë a “trongëne [ . . . ] la nöje Galilaia asë, me cainöj hnine la itre sunago,” nge drenge hë la itre xa nöje la itre huliwa nyine haine i nyidrë. (Mareko 1:39) Matre hna hane fe drei mejene hnene la ketre lepera. Hnei droketre Luka, hna qaja la pengöne la atre cili me hape, “ka si lepera.” (Luka 5:12) Nge e ngazo catre hë la meci cili, ej a xeni trootro la itre götranene la ngönetrei.

Haawe, ngazo catre hë la meci ne la atre ce, matre nyipiewekë tro angeic a mel ananyi itre xan. Ketre, hna amekötine koi angeic troa sue ka hape, “Pui ngazo hë ni, pui ngazo hë ni!” e traqa ju easenyi angeic hnei itre atr. Hna amekötine lai matre, tha tro kö la itre atr a easenyi catr, wanga ixötrekeu jë la meci cili. (Levitiko 13:45, 46) Ngo nemene la hna kuca hnene la lepera? Angeic a easenyi Iesu jë me sa iwatingöneca, me sipo iele Iesu ka hape: “Joxu, maine ajane nyipë, atreine hi nyipë aloinyi ni.”—Mataio 8:2.

Hane petre hi la ketre lapaun! Ngo drei jë kö la aqane ngazo la iqëmeke i angeic hnei lepera! Nemene jë la aqane sa i Iesu? Maine eö ju fe cili, nemene jë la hnei eö hna troa kuca? Atraqatre la utipine i Iesu, matre nyidrëti a sathe pi la ime i nyidrë, me ketre lai atr. Öni Iesu jë hi: “Ajange hi lai! Mele hë hmunë.” (Mataio 8:3) Eje hi, ma nango jole pi hë koi itre xan troa kapa, ngo ame pe, aca tro patre ju hi la meci ne lai atr.

Aja i eö kö troa hetre joxu ka utipin nge ka men tui Iesu? Ame la aqane nyipiewekëne Iesu la lepera, tre kolo hi a anyipicine koi së laka, e traqa jë Iesu musi elany kowe la fen asë, tro ha eatre la hna perofetan celë hnei Tusi Hmitrötr, kola hape: “Tro nyidëti a hnime la ate ka aköte me ate pë ewekë, nge tro nyidëti a amelene [ . . . ] la ange pë ewekë.” (Salamo 72:13) Eje hi, tro Iesu a eatrëne la aja i nyidrë troa xatuane la nöjei atr ka akötr.

Qëmekene tro Iesu a aloine la lepera, kola enienije la itre atr pine la itre huliwa i nyidrë. Nge enehila, angatr a drei mejene la iamamanyikeu ka tru hnei nyidrëti hna kuca. Ngo ame pe, xele kö Iesu ma tro la itre atr a lapaun pine la hna drei mejen. Atre hi nyidrëti lo hna perofetan ka hape, “tha tro kö a denge la aqane ewekë i angeic’ e kuhu gojeny,” kola hape, tha tro kö a qaja atrune pala ha. (Isaia 42:1, 2) Qa ngöne lai, öni Iesu kowe la lepera hna aloine ka hape: “The qaja pi kö koi ketre, ngo tro jë pe troa amamai eö kowe la atre huuj, nge tro fë jë la huuj hna amekötin ngöne lo Trenge Wathebo i Mose.”—Mataio 8:4.

Ngo pine laka, tru la madrine i angeic, thatreine ju kö angeic lapa thaup. Matre angeic a tro ju me qaja trongëne la ewekë ka traqa. Ame hna amejëne la aja ne la itre atr troa pi atre, nge qaane ju hi lai, goi tha ijiji Iesu hë troa tro iamamany hnine la traon. Matre Iesu a nango lapa aqeanyi ju ngöne la itre götrane gaa mi, nge gaa pë atren. Ngo ame fe e cili, kolo pala hi a traqa la itre atr qa cailo troa ini thei nyidrë, me aloine la itre meci angatr.