Be ni Yesu kɛ ekaselɔi ejwɛ lɛ shiɛɔ yɛ ‘kpeehei lɛ yɛ Galilea niiaŋ fɛɛ’ lɛ, naakpɛɛ nibii ni efeɔ lɛ he saji gbɛ shwã waa. (Marko 1:39) Anu nibii ni efeɔ lɛ he yɛ maŋ ko ni nuu ko ni miiye kpiti yɔɔ mli lɛ mli. Helatsalɔ Luka tsɔɔ mli akɛ, eji nuu ni “kpiti eshwie ehe fɛɛ.” (Luka 5:12) Kɛ́ hela fɔŋ nɛɛ mli wa lɛ, efiteɔ gbɔmɔtso lɛ hei srɔtoi fiofio.

No hewɔ lɛ, kpitiyelɔ nɛɛ miina nɔ waa, ni aakpa gbɛ akɛ etsi ehe kwraa kɛje mɛi ahe. Kɛfata he lɛ, kɛ́ eebɛŋkɛ mɛi lɛ, esa akɛ ebolɔ akɛ, “Mihe tseee! mihe tseee!” koni amɛkabɛŋkɛ lɛ fe nine ni hela lɛ tsɛŋe amɛ. (3 Mose 13:45, 46) Shi, mɛni moŋ kpitiyelɔ nɛɛ fee? Etee Yesu ŋɔɔ ni eyakoto lɛ, ni ekpa lɛ fai ekɛɛ: “Nuŋtsɔ, kɛ́ oosumɔ lɛ, obaanyɛ ohã mihe atse.”​—Mateo 8:2.

Mɛɛ hemɔkɛyeli po nuu lɛ yɔɔ yɛ Yesu mli nɛkɛ! Ehela lɛ hu ehã enii efee mɔbɔmɔbɔ! Te Yesu baafee enii ehã tɛŋŋ? Eji oyɛ jɛmɛ kulɛ, mɛni obaafee? Yesu musuŋ tsɔ lɛ, ni ekpã enine mli ni eta nuu lɛ he. Yesu kɛɛ lɛ akɛ: “Miisumɔ! Ohe atse.” (Mateo 8:3) Eyɛ mli akɛ ewa kɛhã mɛi komɛi akɛ amɛaahe enɛ amɛye moŋ, shi kpiti lɛ tã yɛ nuu lɛ he amrɔ nɔŋŋ.

Ani osumɔŋ akɛ oná maŋtsɛ ko ni musuŋ tsɔɔ lɛ, ní baanyɛ afee nibii tamɔ nɛkɛ? Bɔ ni Yesu kɛ kpitiyelɔ nɛɛ ye hã lɛ maa nɔ mi kɛhãa wɔ akɛ, kɛ́ eeye shikpɔŋ muu lɛ fɛɛ nɔ Maŋtsɛ lɛ, Biblia mli gbalɛ nɛɛ baaba mli akɛ: “Eeena ohiafo kɛ mɔ ni efĩ lɛ lɛ mɔbɔ, ni ehere mɛi ni efĩ amɛ lɛ asusumai ayiwala.” (Lala 72:13) Hɛɛ, nakai be lɛ mli lɛ, Yesu baaye abua mɛi fɛɛ ni naa nɔ lɛ, taakɛ eshweɔ waa lɛ.

Kaimɔ akɛ, dani Yesu baatsa kpitiyelɔ nɛɛ po lɛ, no mli lɛ esɔɔmɔ nitsumɔ lɛ ehã mɛi ená miishɛɛ pam. Agbɛnɛ lɛ, mɛi baanu naakpɛɛ nii ni efee nɛɛ he. Kɛ̃lɛ, Yesu sumɔɔɔ ni mɛi damɔɔ nɔ ni amɛnu lɛ kɛkɛ nɔ amɛnáa hemɔkɛyeli yɛ emli. Ele gbalɛ ni kɛɔ akɛ, “ehãŋ anu egbee yɛ blohuiaŋ,” ni tsɔɔ akɛ, efeŋ nakai yɛ gbɛ ni baahã mɛi agbala amɛjwɛŋmɔ kɛba enɔ lɛ nɔ. (Yesaia 42:1, 2) Enɛ hewɔ lɛ, Yesu fã nuu ni etsa ekpiti lɛ akɛ: “Kwɛmɔ ni okakɛɛ mɔ ko, shi moŋ yaa, okɛ ohe ayatsɔɔ osɔfo lɛ, ní oŋɔ nɔkeenɔ ni Mose fo efɔ̃ shi lɛ ohã.”​—Mateo 8:4.

Shi taakɛ obaakpa gbɛ lɛ, nuu lɛ mii shɛ ehe waa akɛ atsa lɛ aahu akɛ, enyɛɛɛ efee dioo yɛ nɔ ni afee ahã lɛ nɛɛ he. Eyiŋ etee, ni eyagbɛ sane lɛ eshwã. Enɛ tee mɛi amiishɛɛ shi babaoo, ni amɛtao akɛ amɛle nibii pii yɛ Yesu he. Eshɛ he ni agbɛnɛ lɛ, Yesu nyɛɛɛ aya maŋ ko mli kpetekplee dɔŋŋ, no hewɔ lɛ ekome too eyahi he ko banee kɛyashi be ko. Fɛɛ sɛɛ lɛ, mɛi jɛ jɛmɛ niiaŋ fɛɛ ba eŋɔɔ koni etsɔɔ amɛ nii, ní etsa amɛ.